Հայաստանի մէջ Ֆրանսայի դեսպանութիւնը«X» ընկերային ցանցի իր հաշիւով կը տեղեկացնէ, որ Ֆրանսայի Արտաքին գործոց նախարարութեան ընդհ. քարտուղարի տեղակալ Տաւիտ Պերթոլոթթի Հայաստանի կազմակերպած «Երեւանեան երկխօսութիւն» միջազգային համաժողովի ընթացքին վերահաստատած է Ֆրանսայի յանձնառութիւնը Հայաստանի նկատմամբ։

Ան ընդգծած է սահմաններու հարցին մէջ «ամուր սկզբունքներու վերահաստատման» կարեւորութիւնը՝ կրկնելով, որ Հայաստան կրնայ վստահիլ Ֆրանսայի նեցուկին։

Պերթոլոթթի անդրադարձած է նաեւ հաղորդակցութեան ուղիներու խնդրին` ըսելով, որ պէտք չէ զայն վերածել շահարկման գործիքի: Ան եւս յայտարարած է, որ Ֆրանսա կ՚աջակցի խաղաղութեան պայմանագրի կնքման` ողջունելով այս ոլորտին մէջ արձանագրուած յառաջընթացը: