Ֆրանսայի հայկական կազմակերպութիւնները համակարգող խորհուրդին դիմումը Պատժական միջազգային ատեանի դատախազին

Ֆրանսահայ կազմակերպութիւնները Համակարգող խորհուրդը (CCAF)՝ Փարիզի փաստաբաններու պալատի եւ Պատժական միջազգային ատեանի (ՊՄԱ) փաստաբան Սեւակ Թորոսեանի միջոցով դիմեց ՊՄԱ-ի դատախազին։

Դիմումին մէջ կը նշուի.

«Ազերպայճանի լայնածաւալ զինուորական յարձակումը Արցախի բնակչութեան դէմ՝ 2020 Սեպտեմբեր 27-էն մինչեւ 2023 Հոկտեմբեր 4, պատճառ դարձաւ 120.000 հայերու տեղահանութեան եւ անոնց հազարամեակներու քաղաքակրթութեան ժառանգութեան կորուստին:

Բազմաթիւ ոչ-կառավարական կազմակերպութիւններ, ինչպէս նաեւ ՊՄԱ-ի առաջին դատախազ Լուիս Մորենօ Օքամփօ, բոլորն ալ ցեղասպանութեան, մարդկութեան դէմ յանցագործութիւններու եւ պատերազմական ոճիրներու մեղադրանքներ առաջադրեցին՝ ի տես Ազերպայճանի իշխանութիւններու կատարած վայրագութիւններուն:

CCAF-ի համանախագահներ Արա Թորանեան եւ  Մուրատ Փափազեան վերջերս դիմեցին Ֆրանսայի կառավարութեան՝  անոր կոչ ընելով դիմելու ՊՄԱ-ին՝ քննութեան ձեռնարկելու համար Ազերպայճանի Հանրապետութեան նախագահ Իլհամ Ալիեւի դէմ:

Ամբողջ Արեւմուտքը առայժմ խիզախութիւն չէ ցուցաբերած։

1915-էն ի վեր երկրորդ անգամն է, որ հայերը դէմ-յանդիման կը գտնուին արդարութեան այսպիսի ժխտումի մը: Այս իրավիճակը անընդունելի է: ՊՄԱ-ի կոչումն է չէզոքացնել ցեղասպան ղեկավարները եւ վերջ դնել ժխտումի բոլոր ձեւերուն:

Հետեւաբար, հիմնուելով Հռոմի կանոնադրութեան 15-րդ յօդուածին վրայ, Լա Հէյի դատախազէն կը պահանջուի.

• նկատի առնել, որ ողջամիտ հիմք գոյութիւն ունի քննութեան ձեռնարկելու 2020-2023 թուականներուն Արցախի հայերուն դէմ գործուած յանցագործութիւններուն համար,
• նախաքննական պալատին ներկայացնել Արցախի վիճարկուող տարածքի մասին Ատեանի տարածքային իրաւասութեան հարցը,
• միջազգային ձերբակալութեան հրաման արձակել Ազերպայճանի Հանրապետութեան նախագահ Իլհամ Ալիեւի եւ 2020-2023 թուականներուն Արցախի մէջ գործուած յանցագործութիւններուն մասնակցած բոլոր անձերուն դէմ»: