Յունուար 30-ին, «Expo 2020 Dubai» միջազգային ցուցահանդէսին շուքով նշուած է Հայաստանի ազգային օրը։ Այս տեղեկութիւնը հաղորդած է ՀՀ Տնտեսութեան նախարար Վահան Քերոբեան Դիմագիրքի իր էջին կատարած գրառումով։
Նախարար Քերոբեանի բացման խօսքէն եւ ՀՀ պետական փառերգի հնչիւններուն ներքոյ Հայկական եռագոյնին վեր խոյանալէն ետք գործադրուած է յատուկ յայտագիր մը, որ բաղկացած է երաժշտական եւ պարային բաժիններէ, ինչպէս նաեւ «Օլիմպիկոս» կենդանապատկերի ցուցադրութենէն։
«Ազգային օրուան պաշտօնական բացման իմ ելոյթին մէջ կարևոր համարած եմ աշխարհում գիտութեան, մշակոյթի և արհեստագիտութիւնների զարգացման գործում հայ գիտնականների և նորարարների անգնահատելի ներդրումը՝ ներկայացնելով նորարարութիւններ, որոնք բեկումնային են եղել մարդկութեան առաջընթացի համար»,– գրած է նախարարը։
Ան նաեւ անդրադարձած է Հայաստանի գործարար և ներդրումային միջավայրի գրաւչութիւններուն, յատկապէս շեշտելով տնտեսութեան այն ոլորտները, որոնք կրնան առաւել հետաքրքրական ըլլալ օտար ներդրողներու համար։
Բացման արարողութիւնը կարելի է դիտել հետեւեալ կապով.-
