Ազերպայճանի Արտաքին գործոց նախարար Ճեյհուն Պայրամով յայտարարած է, թէ՝ Հայաստան կը ձգձգէ «Զանգեզուրի միջանցք»-ի հարցին գծով իր ստանձնած պարտաւորութիւններու իրագործումը, եւ թէ Պաքու ամէն պարագայի երթեւեկութեան հաղորդակցութիւն կը հաստատէ Նախիջեւանի հետ։

“Արդէն սկսած է Արազ (Արաքս) գետի վրայով անցնող առաջին կամուրջի շինարարութիւնը, ըստ Իրանի հետ կայացած համաձայնութեան։ Այսինքն՝ մենք Նախիջեւանի հետ երթեւեկութեան կապի այլընտրանք ունինք”, Պայրամովի այս խօսքերը մէջբերած է «Թուրան» գործակալութիւնը։

Ազերպայճանի դիւանագիտութեան ղեկավարը աւելցուցած է, որ՝ «պարզապէս Հայաստանին առիթ տրուած է, որպէսզի դուրս չմնայ տարածաշրջանային համագործակցութենէն, եւ եթէ Երեւան սխալ որոշում կայացնէ, ապա մի՛այն ինքն իրեն վնաս կը հասցնէ»։