Սեպտեմբեր 7-ին Հայաստանի Պաշտպանութեան նախարար Սուրէն Պապիկեան հանդիպում ունեցած է Քանսասի նահանգապետ Լորա Քելլիի հետ։
Շնորհակալութիւն յայտնելով ջերմ ընդունելութեան համար, Պապիկեան ընդգծած է Հայաստանի եւ Քանսաս նահանգին միջեւ երկար տարիներու պատմութիւն ունեցող բարձր մակարդակի յարաբերութիւններու կարեւորութիւնը։
Իր կարգին, տիկին Քելլի շնորհակալութիւն յայտնած է Պապիկեանին՝ Քանսաս այցելելուն համար եւ վերահաստատած իր պատրաստակամութիւնը գործադրելու առաւելագոյն ջանքը` տարիներու ընթացքին ձեւաւորուած համագործակցութիւնը աւելի զարգացնելու նպատակին։
Հանդիպման աւարտին Պաշտպանութեան նախարարը տիկին Քելլին հրաւիրած է այցելելու Հայաստան։
Ի պատիւ այս այցելութեան, Գանսասի նահանգապետին հռչակագրով Սեպտեմբեր 7-ը յայտարարուած է Հայաստան-Գանսաս գործընկերութեան օր։
ԱՄՆ աշխատանքային այցի շրջանակին մէջ, նախարար Պապիկեան, Հայաստանի՝ Ուաշինկթընի դեսպանուհի Լիլիթ Մակունցի ուղեկցութեամբ, այցելած է Գանսաս նահանգին մէջ՝ Սալինայի ուսումնական կեդրոն, ուր տեսակցութիւն ունեցած է զօրավար Տեյվիտ Վեյշարի հետ։
Կողմերը քննարկած են ԱՄՆ-ու նահանգային գործընկերութեան ծրագրի ծիրէն ներս Հայաստանի եւ Գանսասի միջեւ համագործակցութեան առնչուող շարք մը հարցեր։
