Արցախի Ազգային ժողովի խմբակցութիւնները Սեպտեմբեր 14-ին հրապարակած են ստորեւ տրուած յայտարարութիւնը՝ Հայաստանի ինքնիշխան տարածքի նկատմամբ Ազերպայճանի յարձակումներուն վերաբերեալ.-

«Ադրբեջանի հանրապետութիւնը, անտեսելով միջազգային չափանիշերը, մասնաւորապէս՝ ՄԱԿ-ի կանոնադրութեամբ եւ Հելսինքեան եզրափակիչ բանաձեւով նախատեսուած սկզբունքները, 2022 թուականի Սեպտեմբերի 13-ից պատերազմ է սկսել Հայաստանի Հանրապետութեան դէմ։ Հարուածի տակ են յայտնուել խաղաղ բնակավայրեր եւ ռազմական կառոյցներ, որի հետեւանքով զոհուել եւ վիրաւորուել են հարիւրաւոր զինուորականներ եւ խաղաղ բնակիչներ։

Գլուխ ենք խոնարհում հայրենի երկրի սահմանների պաշտպանութեան համար նահատակուած զինուորների, սպաների, նրանց հարազատների առջեւ։ Զօրակցութիւն ենք յայտնում Հայաստանի Հանրապետութեան մեր հայրենակիցներին եւ կոչ ենք անում համայն հայութեան՝ համախմբուել եւ միասնական ջանքերով պաշտպանել մեր հայրենիքի սահմանները։

2020-ի 44-օրեայ պատերազմի ընթացքում միջազգային հանրութեան անհասցէ կոչերն ու կրաւորական վերաբերմունքը առաւել յարձակողական են դարձրել Ադրբեջանին, որի բոլոր գործողութիւնները հովանաւորւում են Թուրքիայի կողմից։ Ադրբեջանի նման կեցուածքը եւ կասկածելի խաղաղութեան օրակարգը հայ ժողովրդին կանգնեցնում է ֆիզիքական բնաջնջման վտանգի առջեւ։ Կոչ ենք անում միջազգային հանրութեան՝ հասցէական դատապարտել Ադրբեջանի յարձակողական գործողութիւնները եւ գործնական քայլերի ձեռնարկել Հայաստանի Հանրապետութեան ինքնիշխանութիւնն ու տարածքային ամբողջականութիւնը պահպանելու եւ տարածաշրջանում կայուն խաղաղութիւն հաստատելու համար»։

«Ազատ Հայրենիք – ՔՄԴ», «Միասնական հայրենիք», 

«Արդարութիւն», «Հայ Յեղափոխական Դաշնակցութիւն», 

«Արցախի ժողովրդավարական կուսակցութիւն»