Վարչապետ Փաշինեան, Սեպտեմբեր 24-ին, ՄԱԿ-ի Ընդհանուր ժողովի 76-րդ նստաշրջանի իր ելոյթին մէջ անդրադարձած է 44-օրեայ պատերազմի ընթացքին ազէրպայճանական բանակին գործած միջազգային չափանիշերու բազմաթիւ կոպիտ խախտումներուն, ինչպէս նաեւ խօսած է Ազէրպայճանի վերահսկողութեան տակ գտնուող տարածքներուն մէջ հայ ժողովուրդի ցեղային զտման ենթարկման մասին:
“2020 թուականի աշնան Լեռնային Ղարաբաղը ենթարկուեցաւ յարձակման: Քառասունչորս օր տեւած պատերազմը խլեց քանի մը հազար կեանք: Լեռնային Ղարաբաղի տասնեակ հազարաւոր բնակիչներ տեղահանուեցան: Յարձակումը կ՚ուղեկցուէր ազէրպայճանական զինուած ուժերուն կողմէ միջազգային չափանիշերու բազմաթիւ կոպիտ խախտումներով, ներառեալ՝ քաղաքացիական բնակչութեան եւ կենսական ենթակառոյցներու դիտաւորեալ թիրախաւորմամբ, ռազմագերիներու եւ քաղաքացիական պատանդներու արտադատական մահապատիժներով, անոնց նկատմամբ կիրարկուող խոշտանգումներով եւ բազմաթիւ այլ փաստագրուած յանցագործութիւններով։ Այս գործողութիւններուն հետեւանքով Լեռնային Ղարաբաղի այն հատուածներուն մէջ, որոնք յայտնուած են Ազէրպայճանի վերահսկողութեան ներքոյ, հայ ժողովուրդը ենթարկուած է ամբողջական ցեղային զտման։ Ցաւօք, միջազգային հանրութիւնը այս անգամ եւս չկրցաւ կանխարգիլել զանգուածային ոճրագործութիւնները։ Այսօր ոեւէ Հայ չ՚ապրիր եւ գործնականին մէջ չի կրնար ապրիլ Ազէրպայճանի վերահսկողութեան տակ գտնուող տարածքներուն մէջ”,- ըսած է ՀՀ վարչապետը:
Ան յիշեցուցած է, որ Ռուսաստանի միջնորդական ջանքերուն շնորհիւ կարելի եղաւ կանգնեցնել արիւնահեղութիւնը։
“Նոյեմբեր 9-ին ստորագրուեցաւ հրադադարի եռակողմ յայտարարութիւն։ Լեռնային Ղարաբաղի մէջ հաստատուեցան Ռուսաստանի խաղաղապահ ուժեր, որոնք այսօր կը հանդիսանան այնտեղ կայունութեան եւ անվտանգութեան ապահովման երաշխիքը”,– աւելցուցած է Փաշինեան:
