Արցախի Հանրապետութեան նախկին Պետական նախարար Արտակ Բեգլարեան Ամանորեայ իր ուղերձին մէջ յայտարարած է, թէ Արցախի էջը փակելու ցանկութիւն ունեցողները կա՛մ դարձի կու գան, կա՛մ օր մը կ՚առերեսուին Ժողովուրդի ու Աստծոյ արդար դատաստանին։

«Այս տարին ամփոփելիս բոլորս մտաբերում ենք առաջնահերթօրէն արիւն, կորուստ, արտասուք, ազգային մեծագոյն ողբերգութիւն, խարան, քանի որ կորցրել ենք մեր հինաւուրց եւ սրբազան Հայրենիքը, մեր արժանապատւութիւնն ու արժեհամակարգի յենասիւնը: Իրականում անհնար է բառերով նկարագրել այն ցաւը, որն ապրել ու ապրում են Արցախահայութիւնը եւ Արցախի բացառիկ արժէքը գիտակցող Հայերը:

Միւս կողմից, սա մեր պատմութեան աւարտը չէ, եւ կեանքը շարունակւում է՝ իր մարտահրաւէրներով ու հնարաւորութիւններով հանդերձ: Ուստի, մենք պարտաւոր ենք գալիք տարին եւ տարիները օգտագործել արդիւնաւէտ կերպով՝ վերականգնելու մեր արժանապատւութիւնն ու անդորրը, փայփայելու Հայոց Հայրենիքի մնացեալ մասը եւ արժանապատիւ կերպով վերադառնալու Արցախ: Այդ նպատակը ենթադրում է ազգային գաղափարախօսութիւն ու համախմբում, արդիւնաւէտ կառավարում ու հզօր Հայոց Պետականութիւն:

Թո՛ղ 2024 թուականը բերի արժեհամակարգային յարութիւն եւ երկարաժամկէտ պայքարի ոգի մեր ժողովրդի համար, իսկ իւրաքանչիւր Հայի օջախին՝ երջանկութիւն, ներդաշնակութիւն ու խաղաղութիւն: Թո՛ղ կորչեն անցնող տարուայ մեղքերը, զրկանքներն ու դժբախտութիւնները:

 Շնորհակալութի՛ւն Հայրենիքի ու մեր բոլորիս արժանապատւութեան պաշտպանութեան գործում այս տարի եւս ներդրում ունեցած անձանց՝ զոհուած թէ ողջ: Յատուկ խոնարհումս բոլոր ժամանակների զոհուածների հարազատներին եւ այժմ Հայոց Հայրենիքի սահմաններին հսկող պաշտպաններին: Ներողութիւն բոլոր հայրենակիցներիս իմ բաժին բացթողումների համար:

Սրտանց ու ամուր գրկում եմ բոլոր նրանց, ովքեր գիտակցում են Արցախի արժէքը, խորապէս ցաւում են մեր կորուստների համար եւ զգում են պատասխանատւութիւն Մայր Հայաստանը փայփայելու եւ Արցախը վերադարձնելու ապագայ պայքարի մէջ: Իսկ Արցախի էջը փակելու ցանկութիւն ունեցող անձինք կա՛մ դարձի կը գան, կա՛մ մէկ օր կ՚առերեսուեն Ժողովրդի ու Աստծոյ արդար դատաստանին:

Անկախ բոլոր հանգամանքներից՝ շնորհաւոր Ամանոր ու Սուրբ Ծնունդ:

Բոլորիս միահամուռ հաւատքով ու ջանքով՝ մենք մէկ օր անվտանգ ու արժանապատիւ կերպով տօնելու ենք այս տօները կրկին Արցախում, վերագտնելու ենք մեր սրտերն ու հոգիներն այնտեղ»,– իր ուղերձին մէջ նշած է Բեգլարեան։