Ռուբինեան. «Սա պահուս Հայաստանի ու Թուրքիոյ բանագնացներու հանդիպում չէ նախատեսուած» 

Ազգային ժողովի փոխնախագահ Ռուբէն Ռուբինեան «Ազատութիւն» լրասփիւռին յայտնած է, թէ Երեւանի ու Անգարայի յատուկ բանագնացներու հանդիպում սա պահուս չէ նախատեսուած։ Ան այլ մանրամասնութիւններ չէ հաղորդած։

Հայ-թրքական յարաբերութիւններու բնականոնացման հարցերու բանագնացներ Ռուբէն Ռուբինեան եւ Սերտար Քըլըչ ցարդ պաշտօնական չորս հանդիպում ունեցած են, վերջինը շուրջ մէկուկէս տարի առաջ, Վիեննայի մէջ:

Նշենք, թէ ԵԱՀԿ-ի նախարարական համագումարին մասնակցած Հայաստանի Արտաքին գործոց նախարար Արարատ Միրզոյեան «Խաղաղութեան խաչմերուկ» նախագիծը ներկայացնելու ընթացքին ընդգծած էր Հայաստան-Թուրքիա սահմանի բացման ու գոյացած համաձայնութիւններու իրագործման կարեւորութիւնը։

“Ինչպէս տեղեակ էք, մենք համաձայնութիւն ձեռք բերած ենք բանալու ցամաքային սահմանը 3-րդ երկիրներու եւ դիւանագիտական անցագիր կրող՝ Հայաստանի եւ Թուրքիոյ քաղաքացիներուն համար, ինչ որ վերահաստատեց նախարար Ֆիտան, Հոկտեմբեր 23-ի մեր երկկողմ հանդիպման ընթացքին: Եւ նոյնիսկ յստակ ժամկէտեր  նշուեցան՝ նկատի ունենալով յառաջիկայ շաբաթները, եւ կը յուսանք, որ մօտ ապագային մենք կեանքի կը կոչենք այս առաջին, սակայն բաւական շօշափելի քայլը”,– ըսած էր Միրզոյեան։