Ս. Փեթերսպուրկի մէջ կայացող Եւրասիական տնտեսական միութեան (ԵԱՏՄ) բարձրագոյն խորհուրդի յաջորդական նիստին մասնակցած են Ռուսաստանի, Պելառուսի, Ղազախստանի, Քիրկիզստանի նախագահները եւ Հայաստանի վարչապետը: 

Նախ տեղի ունեցած է նեղ, այնուհետեւ՝ ընդլայնուած կազմով նիստը, որուն մասնակցած է նաեւ Իրանի Արդիւնաբերութեան, հանքերու եւ առեւտուրի նախարար Ապպաս Ալի-Ապատի: Նիստէն առաջ ԵԱՏՄ-ի անդամ պետութիւններու եւ Իրանի միջեւ ստորագրուած է ազատ առեւտուրի վերաբերեալ համաձայնագիր մը:

Վարչապետ Փաշինեան իր ելոյթին մասնաւորապէս նշած է, թէ ԵԱՏՄ-ն տնտեսական միաւորում ըլլալով պէտք չէ ունենայ քաղաքական, առաւել եւս աշխարհաքաղաքական օրակարգ։ “ԵԱՏՄ-ն եւ անոր տնտեսական սկզբունքները պէտք չէ փոխկապակցուին քաղաքական յաւակնութիւններու հետ։ 2024 Յունուար 1-էն Հայաստան կը ստանձնէ ԵԱՏՄ-ի նախագահութիւնը եւ այդ առումով կարեւոր է անդամ երկիրներու աջակցութիւնը` մեր դէմ ծառացող մարտահրաւէրները դիմակայելու տեսանկիւնէն”,– ընդգծած է ան։

Նիստին քննարկուած են Միութեան շրջանակին մէջ տարբեր բնագաւառներու համագործակցութեան վերաբերող հարցեր: Որոշում կայացուած է ԵԱՏՄ-ի յաջորդ նիստը գումարել 2024 Մայիսին` Մոսկուայի մէջ: