Վարչապետ Նիկոլ Փաշինեանի շնորհաւորական ուղերձը ԱՄՆ-ու նախագահին

Հայաստան-ԱՄՆ

 

Վարչապետ Նիկոլ Փաշինեան հետեւեալ շնորհաւորական ուղերձը յղած է Ամերիկայի Միացեալ Նահանգներու նախագահ Ճօ Պայտընին՝ ԱՄՆ-ու Անկախութեան օրուան առթիւ.-

«Ջերմօրէն շնորհաւորում եմ Ձեզ եւ Միացեալ Նահանգների բարեկամ ժողովրդին Անկախութեան օրուայ կապակցութեամբ: 

Ամէն տարի Յուլիսի 4-ին միլիոնաւոր Ամերիկացիներ, այդ թւում՝ ամերիկահայ մեր հայրենակիցները, տօնում են Միացեալ Նահանգների ամենակարեւոր օրը՝ Անկախութեան տօնը: Անկախութեան հռչակումից յետոյ ԱՄՆ-ի ժողովուրդը եւ բոլոր կառավարութիւնները հետեւողականօրէն գնացել են ազատութեան, մարդու իրաւունքների, օրէնքի գերակայութեան, ժողովրդավարութեան հաստատման ու ամրապնդման ճանապարհով: Միացեալ Նահանգների դերակատարութիւնն ու առաջնորդութիւնը ժողովրդավարութեան հարցում էական դեր է խաղում ո՛չ միայն աշխարհի տարբեր անկիւններում մարդու իրաւունքների եւ օրէնքի գերակայութեան հաստատման, այլեւ տարածաշրջանների ժողովուրդների համար կանխատեսելի ու խաղաղ  զարգացման միջավայր ձեւաւորելու տեսանկիւնից: 

Մեր երկու պետութիւնների եւ ժողովուրդների միջև բարեկամութիւնն ու գործընկերութիւնը խարսխուած են ընդհանուր արժէքների, փոխվստահութեան եւ բարեկամութեան վրայ: Ուրախ եմ արձանագրել, որ ժողովրդավարութեան ամրապնդման հարցում մեր կառավարութիւնների միջեւ համագործակցութիւնը եւ երկուստեք յանձնառութիւնը տալիս են շօշափելի արդիւնքներ: 

Կրկին շնորհաւորելով Անկախութեան օրուայ կապակցութեամբ՝ մաղթում եմ Ձեզ եւ Միացեալ Նահանգների ժողովրդին բարօրութիւն եւ խաղաղութիւն: 

Ընդունեցէ՛ք խնդրեմ, մեծարգոյ նախագահ, խորին յարգանքիս հաւաստիքը»։

© 2022 Բոլոր իրաւունքները վերապահուած են