Իրաւապաշտպան Արման Թաթոյեան՝ անդրադառնալով Ազգային ժողովին մէջ «Քաղաքացիական պայմանագիր» խմբակցութեան անդամներուն կողմէ ատելութիւն սերմանող քարոզչութեան ու թշնամութեան հրահրումին, հրապարակած է ստորեւ տրուած հաղորդագրութիւնը.
«ԱԺ ՔՊ խմբակցութեան անդամները ատելութիւն են քարոզում ու հրահրում թշնամանք՝ հասարակութեան ու բարոյական չափանիշերի նկատմամբ բացայայտ արհամարհական վերաբերմունք ցուցաբերելով ու անպարկեշտ արտայայտութիւններով անցնելով բոլոր սահմանները։
Կառավարող խմբակցութեան անդամը ԱԺ ամբիոնից ժողովրդի իրենցից դժգոհ մասին անուանում է «ներքին թշնամի», իսկ Ամենայն Հայոց կաթողիկոսին հրապարակայնօրէն դիմում է բացայայտ արհամարհանքով, «դու»-ով ու անպարկեշտ բառերով, իշխանութիւնից դժգոհ մարդկանց անուանում բորենի եւ այլն։
Սա թշնամանքի հրահրում է:
Սա ուղղակի լկտի բառապաշար է՝ օգտուելով առիթից, որ կառավարող խմբակցութիւն են ներկայացնում ու բարձրաստիճան պաշտօն են զբաղեցնում, ստանձնել են երկրի կառավարումը։ Մինչդեռ, իրենք են պարտաւոր լինել համերաշխութեան օրինակ եւ կրում են երկրում իրավիճակի համար պատասխանատւութիւնը:
Այս սանձարձակ պահուածքի պատճառն այն է, որ գտնւում են քաղաքական բարձրագոյն հովանաւորութեան ներքոյ:
Բայց դրանից առաջ լաւ կը լինէր մտածէին, որ այդ արարքները պարունակում են Քրէական օրէնսգրքի 297-րդ ու 329-րդ յօդուածների [առնուազն] յատկանիշեր` պատրաստի ապացոյցներով, այն էլ ծանրացնող հանգամանքներով: Ընդ որում, սրանք հէնց իրենց ընդունած օրէնսգրքի յօդուածներն են, իսկ արարքները ընկնում են այդ յօդուածների տակ՝ իրենց իսկ իշխանութեան հրահանգով ձեւաւորուած գործելաձեւի պատճառով։
Որքա՞ն կարելի է իշխանութեան անառողջ ցանկութիւններին յագուրդ տալ ատելութեան մոլուցքով»։
© 2023 Բոլոր իրաւունքները վերապահուած են։
