Արցախի Հանրապետութեան նախագահ Արայիկ Յարութիւնեան Յունիս 1-ին Մարտակերտի շրջանի Վաղուհաս գիւղին մէջ մասնակցած է մանկապարտէզի շէնքի բացման հանդիսաւոր արարողութեան:

Պետական միջոցներով եւ բարերարներու աջակցութեամբ կառուցուած  շէնքը նախատեսուած է 60 երախայի համար եւ  օժտուած՝ ժամանակակից բոլոր յարմարութիւններով:

Նախագահը խորհրդանշական համարած է Երախաներու իրաւունքներու պաշտպանութեան միջազգային օրը մանկապարտէզի բացումով նշանաւորելը։ Ան շնորհաւորած է բոլոր մանուկները եւ ընդգծած, թէ պետութեան կողմէ կը գործադրուին բոլոր ջանքերը՝ Արցախի փոքրիկներուն համար կայուն եւ արժանապատիւ ապագայ կառուցելու համար:

Արարողութեան մասնակցած են նախարարներ եւ շրջանային վարչակազմի պատասխանատուներ: