(31 դեկտեմբերի, 2024 թ․)

«Սիրելի՛ բարեպաշտ ժողովուրդ,

Ամանորի խորախորհուրդ այս երեկոյ Հայրապետական Մեր սէրն ու օրհնութիւնն ենք բերում ամէնքիդ ի հայրենիս եւ ի սփիւռս։

Դիմաւորում ենք փրկչական 2025 թուականը։ Մեր կեանքում առկայ չփարատուած մտահոգութիւններով ու հոգսերով հանդերձ՝ Նոր տարի մուտք ենք գործում լաւատեսութեամբ եւ բարի սպասումներով։ Ամանորի յուսառատ ապրումները ընտանեկան մեր յարկերում են, եկեղեցիներում ու ծառայութեան վայրերում, ամէնուր, որտեղ համախմբուած ենք միմեանց փոխանցելու մեր մաղթանքներն ու ջերմ զգացումները։

Ամանորը առիթ է ինքնաքննութեան, անդրադառնալու ազգային ու հայրենական մեր կեանքը յուզող խնդիրներին։ Ամանորը հրաւէր է նորոգութեան, հրաւէր ապագայի շուրջ մտորումների, կեանքը առաւել ապահով, բարօր ու շէն դարձնելու նախաձեռնութիւնների։

«Նորոգուեցէ՛ք ձեր մտքով եւ հոգով ու հագէք նոր մարդը, որ ստեղծուած է ըստ Աստծու՝ արդարութեամբ եւ ճշմարիտ սրբութեամբ» (Եփ. 4.23-24),– պատգամում է առաքեալը։ Սուրբգրային այս յորդորին ունկնդիր՝ սիրոյ, բարութեան ու արդարութեան ճանապարհով ընթանալով, կը կարողանանք, սիրելինե՛ր, դիմակայել ծանր, նոյնիսկ անելանելի թուացող իրավիճակներին։ Կարող կը լինենք ուժ գտնել նեղութիւնները համատեղ ջանքերով յաղթահարելու, փորձութիւնները փորձառութեան վերածելու, ձախողումներն ու պարտութիւնները ձեռքբերումների վերափոխելու եւ մեր նոր օրը կառուցելու՝ ապաւինած առաքելական խօսքին, թէ՝ «ամէն բան կարող եմ ինձ զօրացնող Քրիստոսով» (Փիլիպ․ 4․13)։ Այս հաստատ համոզումով ենք պատմութեան ողջ ընթացքում մեր հարազատ բնօրրանում ապրել, մեր պետականութիւնը կերտել եւ օրհասական պահերին յանձնառու ոգիով համախմբուել յանուն հայրենիքի հզօրացման եւ ազգային տեսիլքների մարմնաւորման։ Մաքառել ու տոկացել ենք առ Տէրը յոյսով եւ առաքեալի խօսքի նկատմամբ հաւատքով, թէ՝ նեղութիւն ունենք, բայց ընկճուած չենք, կարօտեալ ենք, բայց յուսահատ չենք, հալածուած ենք, բայց լքուած չենք, չարչարուած ենք, բայց կործանուած չենք (հմմտ. Բ Կորնթ. 4.8-9):

Արդ, մեր կեանքում ծառացած դժուարութիւնների յանդիման հարկ է աննկուն մնալ եւ առկայ մարտահրաւէրների ու պարտադրուող պահանջների հանգուցալուծումը չփնտռել հայրենավնաս զիջումների, մեր սրբութիւններից ու աւանդական արժէքներից հրաժարելու միջոցով։ Աներեր մնանք մեր պատմութեանն ու արժեհամակարգին հաւատարմութեան մէջ, անխաթար պահպանենք մեր ինքնութիւնը, ինչը կարեւոր է նոր սերունդի ոգիի եւ գիտակցութեան կերտման, նաեւ աշխարհում մեր պետութեան եւ ժողովրդի հեղինակութեան ամրապնդման, ազգային իրաւունքների պաշտպանութեան համար։ Հաւատում ենք, որ մեր պատմութիւնը զարդարուելու է նոր վերելքով։ Լուսաւոր գալիքի մեր ձգտումներում զինուենք յոյսով եւ հաւատքով, Աստծուն ապաւինած իրագործենք իւրաքանչիւրս մեր առաքելութիւնը՝ ի սէր անձնական ու հաւաքական մեր կեանքի բարօրութեան։ Նորոգուած կեանքով կարող պիտի լինենք կերտել նոր իրականութիւն, որտեղ գերակայ կը լինեն ուղղամտութիւնն ու համերաշխութիւնը, օրինայարգութիւնն ու հայրենանուիրումը, նոր իրականութիւն, որտեղ իւրաքանչիւր յանձնառութիւն միտուած կը լինի մեր պետութեան հզօրացմանը, ազգի անվտանգ ու արժանապատիւ կեանքի ապահովմանը, արցախահայութեան անօտարելի իրաւունքների պաշտպանութեանը։ Այս տեսլականով վերափոխենք մեր կեանքի ընթացքը եւ միշտ քայլենք սիրոյ եւ միաբանութեան կենարար ճանապարհով։

Սիրելի՛ հաւատաւոր ժողովուրդ, տարեմուտի սեմին աղօթենք առ Աստուած մեր հայրենիքի, հայոց բանակի, հայրենի հողից ու տնից բռնութեամբ զրկուած արցախցիների, նահատակուած զաւակների կորուստը սգացող, գերեվարուած եւ անյայտ կորած սիրելիների ցաւով ապրող ընտանիքների, հիւանդների ու զրկանքների մէջ գտնուողների համար։ Աղօթենք նաեւ աշխարհասփիւռ մեր քոյրերի ու եղբայրների համար, ովքեր կրում են պատերազմների կործանարար հետեւանքները։ Հայցենք խաղաղութիւն համայն աշխարհին, մեր հայրենիքին ու ժողովրդին։ Թող Տէրը օգնական ու զօրակից լինի ազգիս հայոց՝ շնորհելով լուսառատ նոր հորիզոններ։

Շնորհաւոր Նոր տարի։ Բարի եւ օրհնեալ տարի»։