Ալ. Սպենդիարեան օփերայի եւ պալէի ազգային ակադեմական թատրոնի մեներգիչ Գէորգ Յակոբեան Յունուարի սկիզբը ելոյթ ունեցած է Պերլինի գերմանական օփերայի (Deutsche Oper Berlin) բեմին վրայ, Փուչինիի «Թոսքա» օփերային մէջ մարմնաւորելով Սքարփիայի կերպարը։

Յակոբեանի կատարումը արժանացած է Պերլինի խստապահանջ հանդիսատեսի ջերմ ընդունելութեան: Երեւոյթին անդրադարձած է Գերմանիոյ հեղինակաւոր պարբերականներէն Der Opernfreund-ը: «Գէորգ Յակոբեան հանդէս եկաւ իբրեւ նոր Սքարփիա: Անոր հարուստ ու առկայծող գոյներով պարիթոն ձայնը, ինչպէս նաեւ ահազդու արտաքին տեսքն ու դերասանական խաղը անթերի էին չարագործի երաժշտական կերպարին համար: Հայազգի երգիչը որեւէ տեղ չզիջեց եւ արդարացուց բոլոր սպասումները»,– ի միջի այլոց գրած է պարբերաթերթը։