Համազգային հայ կրթական եւ մշակութային միութեան Երեւանի գրասենեակի նախաձեռնութեամբ եւ «Խ. Աբովեան» հայկական պետական մանկավարժական համալսարանի «Սփիւռք» գիտաուսումնական կեդրոնի համագործակցութեամբ լոյս տեսած է «Զահրատ։ 100 բանաստեղծութիւն» ժողովածուն։
Հոկտեմբեր 10֊ին Երեւանի «Աւետիք Իսահակեան» կեդրոնական գրադարանին մէջ տեղի ունեցած է հատորին շնորհահանդէսը։
Իր բացման խօսքին մէջ Համազգայինի Երեւանի գրասենեակի տնօրէնուհի Ռուզան Առաքելեան առանձնացուցած է Զահրատի իւրայատուկ տողն ու գիրը պոլսահայ գրականութեան մէջ։
Համազգայինի Կեդրոնական վարչութեան անդամ Արտաշէս Շահբազեան նշած է, թէ «Զահրատ մեզի համար նաեւ ժամանակի պատմագիր է ու վկայ։ Եւ այդ իմաստով շատ կարեւոր է, որ հրատարակելով այս գիրքը` կարողանանք այդ ժառանգութիւնը փոխանցել այսօրուան ու վաղուան սերունդներուն»։
Զահրատ բանաստեղծի մասին իր սրտի խօսքը ըսած է գրականագէտ, սոյն ժողովածուն կազմող Սուրէն Դանիէլեան։ Ան շեշտած է, թէ Զահրատ կը գրէր մարդու մասին` տառապող մարդու մասին։ “Կը յիշեմ անոր նշանաւոր մէկ արտայայտութիւնը` թախծոտին կեանք ու խինդ, իսկ մեռնողին` յիշատակի զօրութիւն։ Զահրատ մեր բանաստեղծութեան բերաւ այդ կեանքն ու խինդը”,– նշած է Դանիէլեան` աւելցնելով, թէ ամէնքս ալ Զահրատի ստեղծագործութիւններու տիպարներն ենք` տառապող, մենութիւն ու երկուութիւն ապրող մարդու տեսքով։ Հետեւաբար` Զահրատ կ՚ապրի բոլորիս մէջ։
Իրենց սրտի խօսքը ըսած են նաեւ գիրքը խմբագրող, գրականագէտ Քնարիկ Աբրահամեան, բանաստեղծ Խաչիկ Մանուկեան, գրականագէտ Նոնա Դաւթեան։ Շնորհահանդէսին Զահրատի` երգի վերածուած բանաստեղծութիւնները ներկայացուցած է ամերիկահայ երգիչ, թարգմանիչ Պերճ Թիւրապեան։
Բանաստեղծի ստեղծագործութիւններէն ընթերցումներ կատարած են դերասան Արամ Կոստանեան եւ ասմունքող Գայիանէ Սամուէլեան։
Նշենք, թէ գիրքը լոյս տեսած է Համազգայինի Կեդրոնական վարչութեան անդամ Արեւիկ Գաբրիէլեանի հովանաւորութեամբ, որուն միացած են նաեւ Պերճ եւ Անահիտ Թիւրապեան, Արթօ եւ Զապէլ Խրիմեան, Լենա Օհաննէսեան-Սթրիթըր։
© 2023 Բոլոր իրաւունքները վերապահուած են։
