ՀՀ Գիտութեան, կրթութեան, մշակոյթի եւ մարզանքի նախարարութիւնը կը տեղեկացնէ, թէ իր մահկանացուն կնքած է դերասան, բեմադիր Ռաֆայէլ Քոթանջեան։

Ծնած է 1942 Սեպտեմբեր 9-ին, Թիֆլիս: 1946-ին փոխադրուած է Երևան: 1964-ին աւարտած է Երեւանի գեղարուեստա-թատերական հիմնարկի դերասանական բաժանմունքը: 1968-70 հետեւած է Մոսկուայի հեռատեսիլի բեմադրութեան բարձրագոյն դասընթացքներուն:

1964-66 աշխատած է Զանգեզուրի «Շիրվանզադէ» թատրոնին մէջ` իբրեւ դերասան եւ բեմադիր: 1966-68 եղած է «Արշալոյս» երիտասարդական թատրոնի դերասան: 1970-93 միացած է Երեւանի «Հ․ Ղափլանեան» պետական դրամատիկական թատրոնին` կրկին որպէս դերասան եւ բեմադիր:

Մարմնաւորած է բազմաթիւ դերեր, նկարահանուած՝ հայկական եւ արտասահմանեան ժապաւէններու մէջ.- «Ադամանդէ ձեռքը» (1968), «Տղամարդիկ» (1972), «Բաղդասարը բաժանւում է կնոջից» (1977), «Օտար խաղեր» (1986), «Երեքի սրտերում» (1992), «Ուրախ ուղեւորութիւն» (1994), «Ծովահէնների կայսրութիւնը» (1994), «Մեր բակը» (1996), «Կոմսուհի տը Մոնսորօ» (1997), «Ռոքսոլանա» (1998-2003), «Կախարդի եօթներորդ մատանին» (1998), «Սէրը չար է» (1999), «Մեր բակը 3» (2006), «Փոփրիշչին» (ըստ Ն. Կոկոլի «Խենթի մը յուշերը» վիպակին – 2007), «Մի նայիր հայելուն» (2009), «11:41» (2015) եւ այլն:

1994-էն եղած է հեռատեսիլի տարբեր յայտագրերու համահեղինակ, 2008-էն՝ Բնութեան եւ հասարակական գիտութիւններու միջազգային ակադեմիայի անդամ: