Մամլոյ  հաղորդագրութիւն

«Յունիս  15–ին, “Հայաստան”  համահայկական  հիմնադրամի  հոգաբարձուներու  խորհուրդը գումարեց իր  տարեկան  նիստը,  զոր  վարած է  Հայաստանի  նախագահ  Վահագն  Խաչատուրեան:

Նիստին  մասնակցեցան  հոգաբարձուներու  խորհուրդի  22  անդամներ,  որոնցմէ  3-ը՝  հեռավար կարգով,  ինչպէս  նաեւ  տեղական  մարմիններու  19  անդամներ,  որոնցմէ  6–ը՝  առցանց:

Նախագահը իր ելոյթին նշեց,  թէ Հիմնադրամը  արդէն  ձեւաւորուած  աւանդութեան  համաձայն  կը  շարունակէ  իր  անմիջական  աշխուժ  մասնակցութիւնը  համահայկական  նշանակութիւն  ունեցող  բոլոր  միջոցառումներուն՝  օժանդակելով  Արցախէն  բռնի  տեղահանուածներուն,  Սուրիոյ  եւ  Լիբանանի  մեր  հայրենակիցներուն: “Հիմնադրամի  գործունէութիւնը  համահունչ  է  անոր համահայկական  առաքելութեան  եւ  նպատակ  ունի  նպաստելու  Հայրենիքի  առջեւ  ծառացած  մարտահրաւէրներու  դիմագրաւման  ու  մեր  հայրենակիցների  համար  ապրելու  եւ  արարելու  բարեկեցիկ  միջավայրի  ստեղծման”,–  շեշտեց նախագահ Խաչատուրեան:

Այնուհետեւ Հիմնադրամի գործադիր տնօրէն Հայկակ Արշամեան զեկուցեց  2023-ի  գործունէութեան  մասին։  Ներկայացուեցան    Հայաստանի մէջ իրագործուող  առողջապահական,  ընկերային,  կրթական,    բնակարանաշինութեան,  վերականգնուող  ուժանիւթի,  մշակոյթի  եւ  ենթակառոյցներու  զարգացման  ուղղուած  քանի մը  տասնեակ  կենսական  եւ  լայնածաւալ  ծրագրերը:

Ան  ըսաւ,  թէ  Հիմնադրամը  կը  շարունակէ  իրականացնել  մեր  հայրենիքին  համար  իր  անկիւնաքարային  դերակատարութիւնը,  իմա՝  զարգացնել  սահմանային  համայնքները,  բարելաւել  մարդոց  կենսապայմանները,  աջակցիլ  կայուն  եւ  ապահով  հասարակութեան  ձեւաւորման,  կրթել  առողջ  եւ  զարգացած  սերունդ,  ստեղծել  յաւելեալ  արժէք  եւ  յառաջխաղացման  նոր  կարելիութիւններ՝  իր  շահառուներուն  համար:

“2023-ին  Հիմնադրամը  իրականացուց  ընդհանուր  առմամբ  4,7  միլիառ  դրամի  կամ  12  միլիոն  տոլար  արժողութեամբ  աւելի  քան  60  մեծ  եւ    փոքր  ծրագիր:  Յատկանշական  է,  որ  2023-ի  համապարփակ  գանձատրման  արդիւնքը  դրական  արձանագրուած է”,–  նշեց  Արշամեան:

Հոգաբարձուներու  խորհուրդը  հաստատեց  “Հայաստան”  համահայկական  հիմնադրամի  2023-ի  տարեկան  գանձատրման    եւ    գործունէութեան  հաշուետւութիւնները, 2024-ի  տարեկան  ամավարկը,  հոգաբարձուներու  խորհուրդի  գործունէութիւնը,  գոյքի  տնօրինումը,  աշխատանքային  ներքին  կանոնակարգը,  ինչպէս  նաեւ  Խորհուրդի  նոր  անդամի  նշանակումը։

Հոգաբարձուներու  խորհուրդը  անգամ մը եւս  շնորհակալութիւն  կը յայտնէ  Հիմնադրամի  հազարաւոր  նուիրատուներուն,  գործընկեր  կազմակերպութիւններուն,  ինչպէս  նաեւ  Հիմնադրամի  տեղական  մարմիններուն  եւ  անձնակազմին, որ կ՚աշխատի  նուիրումով եւ  Հայրենիքի  զարգացման մէջ կ՚ունենայ  անգնահատելի  ներդրում:  

Խորհուրդը  յատկապէս  շնորհակալութիւն կը յայտնէ  համայն  հայութեան՝  համախմբուածութեան,  նուիրուածութեան,  ներգրաւուածութեան  եւ  վստահութեան  համար»: