«Հայաստանի Հանրապետական կուսակցութեան» Գերագոյն մարմինը հրապարակած է յայտարարութիւն մը, ուր մտահոգիչ կը համարուի Ազերպայճանի կողմէ բռնագրաւուած Արցախի Հանրապետութեան տարածքէն ռուսական խաղաղապահ զօրախումբը ետ քաշելու հոլովոյթը եւ այս առնչութեամբ դիմում կը կատարուի Ռուսաստանին։

Յայտարարութեան մէջ յատկապէս նշուած է․

«Ադրբեջանի կողմից բռնագրաւուած Արցախի Հանրապետութեան տարածքից Ռուսաստանի Դաշնութեան խաղաղապահ զօրախմբի դուրսբերման գործընթացը մտահոգիչ եւ անհանգստացնող է, միաժամանակ՝ առաջացնում է բազմաթիւ հարցեր: Ակնյայտ է, որ միջազգային ներկայութեան բացակայութիւնն Արցախում նոր հնարաւորութիւն կը բացի Բաքուի յանցաւոր քայլերի ու հայութեան հետքը վերացնելու քաղաքանութեան համար՝ միաժամանակ լրջագոյն հարուած հասցնելով արցախահայութեան վերադարձի տեսլականին:

Զուգահեռաբար, անհասկանալի են ընդունուած որոշումների իրական նպատակները մի իրավիճակում, երբ մինչեւ վերջերս պաշտօնական Մոսկուան խօսում էր 2020-ի Նոյեմբերի 10-ին ձեռք բերուած հրադադարի վերաբերեալ յայտարարութեան, դրան յաջորդած եռակողմ պայմանաւորուածութիւնների կատարման անհրաժեշտութեան մասին: Այսօր Ռուսաստանի Դաշնութեան կողմից իրականացուող քայլերով յիշեալ պայմանաւորուածութիւնների վերջնական տապալումը խնդրայարոյց է եւ խիստ մտահոգիչ՝ անկախ անգամ Հայաստան Հանրապետութեան գործող իշխանութիւնների որդեգրած կեցուածքից:

Միաժամանակ, բազմիցս նշել ենք, որ Հայաստանի գործող իշխանութիւնների կողմից իրականացուող քաղաքականութիւնը եւ Արցախի «էջը շրջելու» յանցաւոր գործելակերպը որեւէ կերպ չի բխում Հայաստանի ազգային, պետական շահերից, չի արտացոլում հայ ժողովրդի եւ հանրութեան մօտեցումները: Աւելին՝ այն օրինական չէ՝ հաշուի առնելով այն հանգամանքը, որ ուղղակիօրէն հակասում է գործող իշխանութիւնների նախընտրական, ապա նաեւ Կառավարութեան ծրագրերում ամրագրուած դրոյթներին: Սա ակնյայտ ճշմարտութիւն է, որը վստահաբար տեսանելի ու ընկալելի պիտի լինի նաև Ռուսաստանի Դաշնութեան մեր գործընկերների համար:

Ի դէպ, այս համածիրում որքան էլ ռուսական կողմը յղում է կատարում հայաստանեան իշխանութիւնների տարաբնոյթ սխալների վրայ, որքան էլ ընդգծի այսօրուայ վիճակին հասնելու գործում վերջիններիս անմիջական մասնակցութեան փաստը (անկախ դրա առարկայական կամ ենթակայական լինելուց), այնուամենայնիւ, դա որեւէ կերպ չի ազատում Ռուսաստանի Դաշնութեանը՝ Արցախի ժողովրդի նկատմամբ ստանձնած սեփական պատասխանատւութիւնից:

Ճգնաժամային իրավիճակները պահանջում են դրանց յաղթահարման համապատասխան լուծումներ եւ բնականաբար նման իրավիճակում պատկերացնել, որ հայ ժողովրդի համար գոյաբանական նշանակութեան խնդիրներում երկխօսութիւնը պիտի իրականացուի միայն ու միայն օրինականութիւնը կորցրած իշխանութեան հետ, առաւել քան անընդունելի է, աւելին՝ նման գործելաոճը որեւէ դրական արդիւնքի չի հասցնի:

Ելնելով վերոնշեալից՝ դիմում ենք.

– Հայաստանեան հանրութեանը, արցախահայութեանը, Սփյուռքին՝ կոչ անելով լրջօրէն գնահատել իրավիճակը, դրանից բխող հետեւանքները եւ մեկնարկել համախմբուած քննարկումների եւ գործողութիւնների շարք՝ աղէտալի ընթացքը դադարեցնելու նպատակով:

– Դաշնակից Ռուսաստանի Դաշնութեան իշխանութիւններին եւ բարեկամ ռուս ժողովրդին՝ խաղաղապահ զօրախմբի դուրսբերման գործընթացը կասեցնելու եւ այս հարցի շուրջ լայն գործընկերային քննարկումներ սկսելու նպատակով:

Միաժամանակ, կոչ ենք անում նաեւ միջազգային հանրութեանը (մասնաւորապէս Եւրոպական Միութեան եւ ԱՄՆ գործընկերներին) առաջնորդուել արցախահայութեան իրաւունքների վերաբերեալ նախկինում արուած իրենց յայտարարութիւններով, իրավիճակին պատճաշ, ժամանակին, հասցէական եւ գործնական միջոցներով քայլեր ձեռնարկել՝ կասեցնելու Ադրբեջանի յանցաւոր գործելաոճը, կանխելու հերթական ողբերգութիւնը, Ադրբեջանին բերելու երկխօսութեան դաշտ՝ քննարկելու համար միջազգային երաշխիքների ներքոյ արցախահայութեան՝ սեփական բնօրրան վերադարձի հարցերը»: