Արցախի նախագահ Սամուէլ Շահրամանեան նամակով դիմած է Հայաստանի գլխաւոր դատախազ Աննա Վարդապետեանին:

«Հաշուի առնելով, որ վերջին ժամանակներս համացանցում, մասնաւորապէս՝ ընկերային ցանցերում առանձին օգտատէրերի կողմից լայն տարածում են ստացել Արցախի Հանրապետութեան պաշտօնատար անձանց կողմից առերեւոյթ յանցագործութիւններ կատարելու մասին հրապարակումներ, եւ հանգամանքը, որ Արցախի Հանրապետութեան իշխանութիւնները շահագրգռուած են պաշտօնատար անձանց կողմից կատարուած հնարաւոր չարաշահումները բացայայտելու եւ մեղաւոր անձանց պատասխանատւութեան ենթարկելու հարցում՝ նախագահ Սամուէլ Շահրամանեանը նամակով դիմել է ՀՀ գլխաւոր դատախազ Աննա Վարդապետեանին՝ խնդրանքով, որ նմանատիպ հրապարակումները ՀՀ դատախազութիւնն ընդունի որպէս յանցագործութեան մասին հաղորդումներ եւ դրանք քննութեան առնի օրէնսդրութեամբ սահմանուած կարգով։

Այն քաղաքացիներին, ովքեր ունեն տեղեկութիւններ կամ փաստեր վերոգրեալի կապակցութեամբ, յորդորում ենք աջակցել գործընթացին եւ դրանք ներկայացնել ՀՀ իրաւապահ մարմիններին»,– ըսուած է ՀՀ Գլխաւոր դատախազութեան այս առնչութեամբ հրապարակած յայտարարութեան մէջ: