2023 Սեպտեմբեր 1-ին, Գերագոյն հոգեւոր խորհուրդը հրապարակած է ստորեւ տրուած հաղորդագրութիւնը.

«Գերագոյն Հոգեւոր Խորհուրդը, անդրադառնալով հայրենիքի առջեւ ծառացած գոյաբանական մարտահրաւէրներին եւ դրանց հետեւանքով Հայաստանի եւ Արցախի Հանրապետութիւններում ստեղծուած կացութեան, արձանագրում է, որ հայրենական կեանքում առկայ իրավիճակը ծայրայեղ մտահոգիչ է: 

Ադրբեջանական իշխանութիւնների օգտագործած հռետորաբանութիւնը, ինչպէս նաեւ նախաձեռնած քայլերը, ակներեւ են դարձնում, որ վերջինս պաշտօնապէս որդեգրել է ոչ միայն Արցախի Հանրապետութիւնը, այլեւ` Հայաստանի Հանրապետութեան  ինքնիշխան տարածքները բռնագրաւելու, հայկական ինքնութեան հետքերն ու ժառանգութիւնը ոչնչացնելու քաղաքականութիւն` նպատակ հետապնդելով կազմաքանդել Հայոց պետականութիւնը: Ադրբեջանը ոչ միայն չի դադարեցնում Արցախի շրջափակումը, այլեւ շարունակում է իրականացնել  ցեղասպան իր քաղաքականութիւնը` թշնամանքի ու բռնության նորանոր դրսեւորումներով: Ադրբեջանի պետական եւ հանրային ամբողջ քարոզչամեքենան լծուած է հակապատմագիտական թեզերի միջոցով հանրային լայն շրջանակում յերիւրածոյ տեղեկութիւնների տարածմանը: 

Առկայ բարդ ու վտանգաւոր զարգացումների դէմ-յանդիման առաւել քան մտահոգիչ են Հայաստանի իշխանութիւնների անհամաչափ արձագանգներն ու վարքագիծը: Մերժելի է յատկապէս Արցախը Ադրբեջանի կազմում ճանաչելու վերաբերեալ Հայաստանի իշխանութիւնների դիրքորոշումը, որը չունի բարոյական, իրաւական ու անվտանգային որեւէ հիմնաւորում եւ բացարձակապէս չի համապատասխանում մեր ժողովրդի հաւաքական սպասումներին ու ազգային շահերին։ Հայաստանի ինքնիշխանութիւնն ու տարածքային ամբողջականութիւնը` անսակարկելի են, Արցախի ժողովրդի հանրաքուէով իրացուած ինքնորոշման իրաւունքը` անվիճարկելի:

Գերագոյն հոգեւոր խորհուրդը, բարձր է գնահատում Արցախեան խնդրի կարգաւորման ուղղութեամբ միջազգային կառոյցների ներդրած ջանքերը: Այսուհանդերձ, Արցախի Հայութեան առջեւ ծառացած անմիջական սպառնալիքների համածիրի մէջ միջազգային կառոյցների կողմից իրականացուող քայլերն ու նախաձեռնութիւնները, ցաւօք, շարունակում են մնալ  անհամարժէք։ 

Հայրենիքի առջեւ ծառացած գոյաբանական մարտահրաւէրների յաղթահարման համար Հայաստանի իշխանութիւնները պարտաւոր են ձեռնարկել այնպիսի միջոցներ, որոնք կը համախմբեն ազգային, քաղաքական եւ հասարակական կառոյցների ամբողջ ներուժն ու կարողութիւնները` Հայաստանում, Արցախում եւ Սփիւռքում: Հայրենիքն ամէնքինս է, Հայոց պետականութիւնը` սրբազան մասունքը իւրաքանչիւր Հայի: 

Արցախի Հանրապետութեան տօնին` Սեպտեմբեր 2-ին ընդառաջ, Գերագոյն հոգեւոր խորհուրդը իր զօրակցութիւնն է յայտնում Արցախի քաջարի ժողովրդին` հայրենի երկրում ազատ, անկախ ու արժանապատիւ կեանքի համար հերոսական իր պայքարում։ 

Գերագոյն հոգեւոր խորհրդի կոչն է մեր ժողովրդին` ամենայն սթափութեամբ գնահատել երկրում ստեղծուած իրավիճակը, թօթափել անտարբերութեան թմբիրը, յանձնառութիւն ստանձնել  հայրենիքի համար եւ ամէնուր մասնակից ու աջակից դառնալ Արցախի անկախութեան պաշտպանութեան ուղղուած ծրագրերին ու միջոցառումներին: 

Ամուր վստահութիւն ունենք, որ Աստծոյ եւ սերունդների առջեւ ամբողջանուէր պատասխանատւութեամբ եւ մեր նախնեաց քաջարի ոգիով ու տոկունութեամբ կարող պիտի լինենք յաղթահարելու մեզ բաժին ընկած ծանրագոյն մարտահրաւէրները: 

Թող Աստուած օրհնի երկիրն հայրենի եւ ժողովրդեանն Հայոց. ամէն»: