Յունիս 24-ին, Ստեփանակերտի Մշակոյթի եւ երիտասարդութեան պալատին մէջ, ԱՀ ԿԳՄՄ նախարարութեան աջակցութեամբ տեղի ունեցած է Արցախի ազգային նուագարաններու 31 երաժիշտներէ կազմուած պետական նուագախումբին համերգը։

«Արցախփրէս»-ի թղթակցին հետ զրոյցին, նուագախումբի տնօրէն Աշոտ Սարգիսեան յայտնած է, որ տեղւոյն մշակութային կեանքին մէջ յետպատերազմական շրջանին նման նախաձեռնութիւնները եզակի են եւ այնքա՜ն սպասուած։

«Մինչեւ 2020 թուականի պատերազմը նուագախումբը ոչ-պետական կարգավիճակով համերգային ծրագրերով հանդէս էր գալիս թէ՛ մայրաքաղաքում, թէ՛ Արցախի շրջկենտրոններում ու գիւղերում: Այսօր մեր առջեւ ծառացած բազում խնդիրներ կան։ Սակայն, վեր կանգնելով այդ ամէնից, մենք կարողացանք այսօր կազմակերպել համերգը, որը պետական կարգավիճակ ստանալուց յետոյ մեր առաջին համերգն է»,– նշած է Ա. Սարգիսեան եւ աւելցուցած, թէ նուագախումբը պատրաստ է համերգներով հանդէս գալու թէ՛ Հայաստանի եւ թէ՛ Սփիւռքի մէջ:

Համերգին ներկայ եղած են ԱՀ Ազգային ժողովի նախագահ Արթուր Թովմասեան, ԿԳՄՄ նախարար Անահիտ Յակոբեան, պաշտօնատար այլ անձինք, երաժշտասէրներ: