«Արմէնփրէս» – «Համաշխարհային հայկական առաջին գագաթնաժողով»-ի բացման արարողութեան ելոյթ ունեցած է վարչապետ Փաշինեան։ Ան անդրադառնալով Հայաստան–Սփիւռք յարաբերութիւններուն մասնաւորապէս նշած է.-

“Հայաստան–Սփիւռք երկխօսութեան համածիրում այս հաւաքը իրաւամբ սպասուած եւ տեղին է, մանաւանդ այս օրերին, երբ բոլորին ակնյայտ է, որ Հայաստան–Սփիւռք յարաբերութիւնները բովանդակային, ընկերային-հոգեբանական, կազմակերպչական խորը փոփոխութիւնների են ենթարկւում՝ անկախ մեր կամքից: Այդ փոփոխութիւնները տեղի են ունենում ոչ թէ այն պատճառով, որ ինչ-որ մէկը ցանկանում է դա, այլ որովհետեւ համընդհանուր գործընթացներն են պարտադրում նման փոփոխութիւններ: Այդ փոփոխութիւնները կապ չունեն ո՛չ 2018 թուականին Հայաստանում տեղի ունեցած յեղափոխութեան, ո՛չ էլ 2020 թուականի 44-օրեայ պատերազմի ողբերգութեան հետ: Թէ՛ յեղափոխութիւնը, թէ՛ պատերազմը առիթ էին, որ մենք արձանագրէինք ակնյայտը: Իսկ ակնյայտ է այն, որ ժամանակը անխուսափելի ազդեցութիւն է թողնում նաեւ հայկական սփիւռքի էութեան եւ բովանդակութեան վրայ: Ի՞նչ է նշանակում սփիւռքահայ՝ մի դարաշրջանում, երբ մարդը կարող է շաբաթուայ 7 օրը անցկացնել վեց տարբեր աշխարհամասերում: Ի՞նչ է նշանակում լինել սփիւռքահայ այնպիսի պայմաններում, երբ աշխարհի որեւէ վայրից կարելի է վայրկեանների ընթացքում նամակ, լուսանկար ու տեսանիւթ ուղարկել եւ ստանալ, ուղիղ տեսակապ հաստատել ոեւէ մէկի հետ, օրուայ մէջ 24 ժամ: Ի՞նչ է նշանակում համայնքային կեանք այնպիսի պայմաններում, երբ հայ գրականութիւնը, հայկական մամուլը, գրքերը համացանցի միջոցով հասանելի են որեւէ ժամանակ եւ որեւէ վայրում, եւ ոեւէ Հայ որեւէ պահի կարող է խօսել որեւէ այլ Հայի հետ, ընդհանրացնել, կիսել, տարածել որեւէ գաղափար, երբ Հայաստանը համացանցի հասանելիութեամբ ու ազատութեամբ աշխարհի առաջատար երկրների ցանկում է: Սրանք հարցեր են, որոնց պատասխանելը չափազանց կարեւոր է բոլորիս համար”,– ընդգծած է վարչապետը։

Երկրի ղեկավարին կարծիքով՝ այս հարցերու պատասխանները Հայաստանի Հանրապետութեան եւ Սփիւռքի յարաբերութիւններուն մէջ շատ բան կը փոխեն:

“Համոզուած ենք, որ աշխարհասփիւռ հայութիւնը մեծ ներուժ է եւ նման աշխարհասփիւռ պաշար ունեցող երկիրը, ինչպիսին է Հայաստանը, չպէտք է ունենար այն խնդիրները, որն ունի: Իսկ եթէ ունի, նշանակում է՝ մենք շատ բան սխալ ենք արել եւ անում ոչ միայն Հայաստանում, այլեւ Հայաստան–Սփիւռք յարաբերութիւններում”,– շեշտած է Փաշինեան:

Ամէնէն մեծ սխալը, ըստ վարչապետին, այն է, որ Հայաստան–Սփիւռք խօսակցութիւնը սովորաբար կը սկսի, կ՚ընթանայ եւ կ՚աւարտի բոլորին յայտնի կամ ինչպէս ընդունուած է ըսել՝ համազգային հաւանութեան արժանացած ճշմարտութիւններով:

“Սա, ի հարկէ, վատ չէ, սա նոյնիսկ լաւ է, բայց անթերի չէ այն իմաստով, որ չի ընդլայնում ինքներս մեր եւ աշխարհի մասին մեր ունեցած պատկերացումները: Սա էլ իր հերթին հնարաւորութիւն չի տալիս, որ մենք բաւարար արագութեամբ ընկալենք եւ արձանագրենք աշխարհում տեղի ունեցող փոփոխութիւններին, ասել է թէ՝ օգտուենք հնարաւորութիւններից եւ կառավարենք մարտահրաւէրները:

«Համաշխարհային հայկական առաջին գագաթնաժողով»-ը տեղի է ունենում այն պայմաններում, երբ աշխարհի, տարածաշրջանի, նոյնիսկ ինքներս մեր մասին շատ պատկերացումներ, երազանքներ սասանուել են, երբեմն՝ նոյնիսկ փլուզուել: Մեր առաջարկն ու պատկերացումն է ոչ թէ մնալ այդ փլատակների տակ, այլ փորձել գտնել նոր հնարաւորութիւններ, փորձել յատկապէս Հայաստանի Հանրապետութիւնը դարձնել նոր պատկերացումների, նոր երազանքների, նոր մօտեցումների ձեւաւորման եւ զարգացման մի հարթակ, առանցքում ունենալով Հայաստանի անկախ, ինքնիշխան, անվտանգ, ազատ, զարգացած, ժողովրդավարական Հանրապետութիւնը, որովհետեւ որեւէ հայ, միջազգայնացող աշխարհի որեւէ վայրում կարող է ունենալ որեւէ բան՝ բարեկեցութիւն, աշխատանք, փող, ընտանիք եւ բացառութիւն է միայն մէկ բան եւ այդ մէկ բանը Հայաստանի Հանրապետութիւնն է, որի քաղաքացի լինելու հպարտութիւնը եւ երջանկութիւնը կրում է դահլիճում ներկայ մարդկանց մեծամասնութիւնը”,– եզրափակած է վարչապետը: