Ուքրաինայի անկախութեան տօնին առիթով վարչապետ Նիկոլ Փաշինեան շնորհաւորական ուղերձ մը յղած է նախագահ Վոլոտիմիր Զելենսքիին, ուր յատկապէս նշուած է.

«Ջերմօրէն կը շնորհաւորեմ Ուքրաինայի Անկախութեան օրուան առթիւ:

Հայաստանի եւ Ուքրաինայի յարաբերութիւններու հիմքին կը գտնուին մեր երկու ժողովուրդներու դարաւոր բարեկամութիւնը եւ փոխադարձ յարգանքը, որուն լրացուցիչ լիցք հաղորդած է տարբեր մակարդակներու վրայ երկկողմ շփումներու աշխուժացումը:

Լիայոյս եմ, որ մեր միատեղ ջանքերը իրենց նպաստը կը բերեն Հայաստանի եւ Ուքրաինայի յարաբերութիւններու շարունակական զարգացման եւ փոխշահաւէտ համագործակցութեան:

Օգտուելով առիթէն՝ կը մաղթեմ Ձեզի քաջառողջութիւն եւ յաջողութիւններ, իսկ Ուքրաինայի բարեկամ ժողովուրդին՝ խաղաղութիւն եւ ամենայն բարիք»:

Նշենք, թէ նմանօրինակ ուղերձներ յղած են նաեւ Ազգային ժողովի նախագահ Ալէն Սիմոնեան եւ Արտաքին գործոց նախարար Արարատ Միրզոյեան։

Ալիեւ եւս շնորհաւորած է Ուքրաինայի Անկախութեան տօնը

Ազերպայճանի նախագահ Իլհամ Ալիեւ եւս շնորհաւորած է Ուքրաինայի Անկախութեան տօնը։

«Ազերպայճան եւ Ուքրաինա փոխադարձաբար կ՚աջակցին մէկզմէկու տարածքային ամբողջականութեան եւ ինքնիշխանութեան՝ ՄԱԿ-ի կանոնադրութեան, միջազգային չափանիշերուն ու սկզբունքներուն համապատասխան։ Մտադիր ենք հետագային եւս գործադրել բոլոր ջանքերը Ուքրաինայի բարեկամ ժողովուրդին անհրաժեշտ մարդասիրական աջակցութիւն ցուցաբերելու համար»,– նշուած է Ալիեւի ուղերձին մէջ։