Քաղաքագէտ, Ազգային ժողովի նախկին երեսփոխան Թեւան Պօղոսեան՝ Արցախի ներկայացուցչութեան վրայ կատարուած յարձակման կապակցութեամբ յայտարարած է հետեւեալը.

«Բոլոր դիւանագիտական եւ բարոյական չափանիշերով Արցախի Հանրապետութեան ներկայացուցչութեան տարածքը դա Արցախն է։  Մեր Արցախն է։ Յուսամ, որ հայ ազգի համար Արցախը մերն է։ Բայց նորից կրկնեմ այդ տարածքը Արցախ է։ Այդ տարածքի ուղղութեամբ որեւէ գործողութիւն նշանակում է յարձակում Արցախի վրայ։ 

Ստացւում է, որ Արցախի վրայ, բացի թշնամի ադրբեջանա-թուրքական հարեւաններից, տեղի է ունեցել նաեւ Հայաստանի գործող ուժային կառոյցի յարձակում` ջարդելով դարպասը եւ գոյք տանելով։
Մի րոպէ պատկերացրէք նման բան ԱՄՆ-ի, Ռուսաստանի կամ Ֆրանսիայի դեսպանատների կամ հիւպատոսական ծառայութիւնների վրայ։ Յատուկ այդ երկրները նշեցի, որպէս ԵԱՀԿ Մինսկի խմբի համանախագահ երկրներ։

Այս մի կարմիր գիծն էլ անցանք։ Արցախի երաշխաւորից, Արցախի վրայ յարձակուողի հասանք։
Իրաւացի էր մեր ազգային հերոսը` ասելով, որ կորցնելով Արցախը շրջելու ենք Հայոց պետականութեան վերջին էջը։ Դարպաս ջարդել՝ հայը հայի հետ բանակցել, խօսել, հոգ տանել, … ասա որը ասես, որը մնայ։

Հրաման կատարելը նոյնպէս պատիւ պէտք է բերի, յատկապէս երբ երդում էք տալիս, տղերք, տեսնես քանիսդ էք այդ դարպասը ջարդողներից Հայրենիքի Արցախեան սահմանին անցել ձեր պարտադիր զինուորական ծառայութիւնը եւ մի գուցէ նոյնիսկ հերոսութիւններ արել։ Վա՜յ մեզ, այս ո՞ւր հասանք։ Ո՞նց կարողացաք յարձակուել Արցախի վրայ»։