Արտակ Բեգլարեան.– «Ադրբեջանի իշխանութիւնները անթաքոյց շարունակում են հայատեաց ու յարձակողական քաղաքականութիւնը» 

Բեգլարեան

Յուլիս 29-ին, Արցախի Հանրապետութեան Պետական նախարար Արտակ Բեգլարեան Թելեկրամեան իր ալիքով յայտարարած է, թէ Ազերպայճանի ռազմաքաղաքական ղեկավարութեան վերաբերումը Հայերու նկատմամբ տասնամեակներէ ի վեր դրսեւորուած է ատելութեան, ֆիզիքական ու հոգեբանական բռնութեան, սպանելու յանցաւոր վարքով, եւ որեւէ հիմք չկայ նոյնիսկ ենթադրելու, որ տեսանելի ապագային Ազերպայճան կրնայ փոփոխութեան ենթարկել այդ ռազմավարութիւնը:

«Թաղավարդում ու Կարմիր Շուկայում խաղաղ բնակիչների տների ուղղութեամբ արձակած գնդակները եւ վերջին օրերի հրադադարի այլ խախտումները դրա հերթական ապացոյցներն են: Ադրբեջանի իշխանութիւնները որքան էլ խաղաղութիւն ու բարեկրթութիւն խաղան, միեւնոյն է՝ նրանք անթաքոյց կերպով շարունակում են հայատեաց ու յարձակողական քաղաքականութիւնը՝ նպատակ ունենալով հայաթափել Արցախը և նուաստացնել հայկական պետականութիւնն ու բոլոր Հայերին: Քանի դեռ Ադրբեջանի իշխանութիւններն ու ժողովուրդը պատրաստ չեն իրական ու բոլոր կողմերի համար արժանապատիւ երկխօսութեան ու խաղաղութեան, հակամարտութիւնը չի կարող կարգաւորուել եւ տարածաշրջանում էլ երկարաժամկէտ կայունութիւն չի կարող լինել: Արցախի ժողովրդի ինքնորոշման իրաւունքի ճանաչումն ու պաշտպանութիւնը այլընտրանք չունի, քանի որ մենք ենք մեր ճակատագրի տէրը մեր հայրենիքում եւ դա է միակ ճանապարհը կանխելու մի նոր ցեղասպանութիւն աշխարհի վրայ»,– ընդգծած է Արցախի հանրապետութեան Պետական նախարարը:

© 2022 Բոլոր իրաւունքները վերապահուած են