Արցախի Պետական նախարար Գուրգէն Ներսիսեան Դիմագիրքի իր էջին գրառումով հաղորդած է, որ ազերական շրջափակման հետեւանքով Արցախի մէջ օր ըստ օրէ աւելցող խնդիրներն ու անոնց հետեւանքները որոշ չափով մեղմելու համար պետութեան կողմէ կը ձեռնարկուին կարելի բոլոր միջոցները: Առկայ են նաեւ հարցեր, որոնց յաղթահարման համար այլեւս կը բացակային անհրաժեշտ միջոցներն ու կարելիութիւնները:

«Կանգնելով ընկերային լուրջ խնդիրների առջեւ, մտահոգուած լինելով մանկահասակ երեխաների, հիւանդների, տարեցների առողջութեամբ, քաղաքացիները բաւական գերլարուած վիճակում են, այդ ամէնին գումարւում են նաեւ ընկերային ցանցերի տարբեր հարթակներում պետութեան հասցէին հնչող քննադատութիւնները, բոլոր խնդիրների լուծման “գիտակների” մեկնաբանութիւններն ու առաջարկները, միասնականութեան կոչերին զուգահեռ կատարուող պառակտման փորձերը, համաժողովրդական յամառ ու դժուարին այս պաշտպանութիւն-դիմադրութիւնը նսեմացնող յայտարարութիւնները:

Բարեբախտաբար ժողովուրդը հասկանում է, որ հայրենիքի պահպանումն ու պաշտպանութիւնը թէեւ դժուար, բայց պատուաբեր գործ է, որի համար անհրաժեշտ են այնպիսի յատկանիշեր, ինչպիսիք են համբերատարութիւնը, տոկունութիւնը, յամառութիւնը, պատուախնդրութիւնը: Թէև զգացականութիւնը եւ ընկճուածութիւնը տարբեր իրավիճակներում ուղեկցում են մեզ, բայց դրանք երբեք չպէտք է դառնան մեր քայլերի որոշիչը:  

Կան բազմաթիւ հարցեր, որոնց մասին ծանրաբեռնուածութեան պատճառով հիմա չեմ կարող խօսել, բայց դրանց անդրադառնալու հնարաւորութիւն ու ժամանակ դեռ կ՚ունենամ, իսկ առայժմ ի հեճուկս բոլոր տեսակի խնդիրների, շարունակում ենք քայլել Արցախի եւ Արցախի ժողովրդի պաշտպանութեան ընտրուած ճանապարհով:

Համոզուած ենք, որ բոլոր միջազգային դերակատարները ի վերջոյ համոզուելու են այն ամէնին, որ արդարօրէն ներկայացնում է Արցախցին»,– մասնաւորապէս նշուած է Պետական նախարարի գրառման մէջ։