«Խոր ցաւով եւ մտահոգութեամբ տեղեկացանք երէկ (Մայիս 28-ին)՝ Հայաստանի Առաջին Հանրապետութեան եւ Սարդարապատի հերոսամարտի 106-ամեակի յիշատակութեան օրը, Հայաստանի Հանրապետութեան ողջ պատմութեան մէջ նախադէպը չունեցող ամօթալի եւ խիստ դատապարտելի իրողութեան մասին:

Սարդարապատի հերոսամարտին, Հայ ժողովրդի համար այդ օրհասական օրերուն զինուորներու, հրամանատարներու, գիւղացիներու, շինականներու եւ մտաւորականներու կողքին մէկ ձեռքով խաչ, միւս ձեռքով զէնք բռնած կը մարտնչէին նաեւ հոգեւորականները: Բախտորոշ այդ օրերուն զինուորական ղեկավարութիւնը կը պահանջէր Ամենայն հայոց Գէորգ Հինգերորդ Սուրէնեանց կաթողիկոսէն փոխադրուիլ աւելի ապահով վայր, իսկ Արամ Մանուկեան կ’առաջարկէր ապահովութեան համար ձգել Մայր Աթոռ Սուրբ Էջմիածինը եւ պատսպարուիլ Սեւան: Անոնք ամէն կերպ կը ջանային ապահովել Հայոց հայրապետի անվտանգութիւնը, պաշտպանել թշնամիի հնարաւոր յարձակումէն:

Այսօր, 106 տարի անց, Հայաստանի Հանրապետութեան ոստիկանութիւնը ոչ միայն չապահովեր Ամենայն հայոց հայրապետի անվտանգութիւնը, այլեւ տարապայման, քստմնելի վերաբերումի դրսեւորմամբ, քանի մը անգամ պատնէշ կազմելով, քաշկռտելով ՝ փորձ կ’ընէ կանգնեցնելու Ն.Ս.Օ.Տ.Տ. Գարեգին Երկրորդ Ամենայն Հայոց Հայրապետի եւ անոր ուղեկցող հոգեւորականութեան ընթացքը դէպի Սարդապարատի յուշահամալիր:

Յանուն Սրբոց Յակոբեանց զինուորեալ միաբանութեան խստագոյնս կը դատապարտենք Հայաստանի ոստիկանութեան ամօթալի եւ անպատուաբեր վարմունքը հանդէպ Ամենայն հայոց հայրապետին: Լիայոյս ենք, որ ոստիկանութիւնը կը վերանայի իր գործելակերպն ու վերաբերումը հանդէպ Հայ առաքելական եկեղեցւոյ եւ Ամենայն հայոց հայրապետին՝ բացառելով նմանօրինակ միջադէպերու կրկնութիւնը:

Մեր զօրակցութիւնը կը յայտնենք Ամենայն հայոց հայրապետին՝ հայցելով Բարձրեալի օգնականութիւնը եւ մաղթելով “երկար օրեր Հայոց հօր”:

Հայոց եկեղեցին մշտապէս եղած է ու պիտի մնայ հայի գոյութեան, հայ մշակոյթի պահպանման, հայոց պետականութեան շէնացման առհաւատչեան, ուստի “Ո՛չ մարդիկ, ո՛չ սուրը, ո՛չ հուրը, ո՛չ ջուրը եւ ոչ ալ որեւէ այլ դառն հարուած…” կրնան խարխլել Հայ առաքելական եկեղեցւոյ հիմերը:                    

Աղօթարար՝

Նուրհան Արք. Մանուկեան

Հայ Պատրիարք Երուսաղէմի»