Հայաստանի մէջ Զուիցերիոյ դեսպանատունը հաղորդագրութեամբ մը կը տեղեկացնէ.

«Մէկ շաբթուան մէջ աւելի քան 100.000 հոգի Լեռնային Ղարաբաղէն փախած է Հայաստան՝ ապահովութիւն, սնունդ, ապաստան եւ հետագային ապրուստի միջոցներ գտնելու համար։ Միջազգային հանրութիւնը, Հայաստանի իշխանութիւնն ու քաղաքացիական հասարակութիւնը կը գործադրեն բոլոր ջանքերը այդ մարդոց օժանդակելու ուղղութեամբ՝ յատկապէս ձմռան նախօրեակին:

Ծայրայեղ այս կացութեան արձագանգելու նպատակով Զուիցերիա  1,5 միլիոն զուիցերական ֆրանք յատկացնելու նախնական որոշում կայացուցած է՝ տեղւոյն վրայ մարդասիրական գործողութիւններուն համակողմանի աջակցելու համար։ Երեք առանցքային դերակատարներու՝ ՄԱԿ-ի Պարէնի համաշխարհային ծրագրին (PAM, Programme Alimentaire Mondial), ՄԱԿ-ի Գաղթականներու օգնութեան ծրագրին (RRP)   եւ Կարմիր Խաչի միջազգային կոմիտէին (CICR) միջեւ հաւասարապէս  բաշխուած (իւրաքանչիւրին՝ 500.000) միջոցները պիտի ուղղուին գաղթականներու կենսական կարիքները բաւարարելու նպատակին»։