Վարչապետ Նիկոլ Փաշինեան անհրաժեշտ կը համարէ Հայաստանի Սահմանադրութեան փոփոխութիւնը։ Յուլիս 5-ին՝ Սահմանադրութեան օրուան առիթով յղած իր ուղերձին մէջ ան յայտարարած է, որ երկրին հարկաւոր է նոր Սահմանադրութիւն։
“Բոլորիս յայտնի հանգամանքների բերումով ՀՀ քաղաքացին այսօր չի համարում, որ Սահմանադրութիւնն իր ու իր հարեւանի, իր ու իր համայնքի, իր ու իր պետութեան միւս բնակիչների հետ ապրելու կանոնների մասին իր պատկերացումն ու պայմանաւորուածութիւնն է արտայայտում: Քաղաքացին համարում է, որ իշխող վերնախաւն է այդ տեքստը ստեղծել, յայտարարել դրա ընդունման մասին եւ ըստ էութեան, ներդրել այն Հայաստանում։
Իմ համոզմունքը եղել եւ մնում է այն, որ սա հիմնարար խնդիր է մեր երկրի համար եւ մեր երկրին հարկաւոր է նոր Սահմանադրութիւն եւ տուեալ պահին խօսում եմ ոչ այնքան տեքստային նորութեան, որքան դրա ստեղծման եւ ընդունման մեթոդի նորութեան մասին: Մեզ պէտք է նոր Սահմանադրութիւն, որը ժողովուրդը համարի իր ստեղծածը, իր ընդունածը, համարի, որ այն, ինչ նրանում գրուած է՝ իր պատկերացումն է իր ստեղծած պետութեան եւ այդ պետութեան մէջ մարդկանց, քաղաքացիների յարաբերութիւնների մասին”։
Փաշինեանի համաձայն՝ «մեզ պէտք է Սահմանադրութիւն, որն օրգանական կապով կապուած է սահմանադիրի՝ ժողովրդի հետ»:
“Այս թեման հիմա շատ է շահարկւում թէ՛ ներքին եւ թէ՛ արտաքին դաշտում: Բայց մենք անշեղօրէն պիտի շարունակենք մեր պետութիւնը՝ Հայաստանի Հանրապետութիւնը ուժեղացնելու, հաստատութենական, հոգեբանական ու ֆիզիքական առումով նրան անխոցելի դարձնելու մեր ճանապարհը: Սա դժուար, բայց պատուաբեր ճանապարհ է ու մենք ընթանում ենք ճիշդ ճանապարհով, բայց այդ ճանապարհն անցնելու համար մեզ պէտք է կենտրոնանալ մի կոնկրէտ խնդրի՝ Հայաստանի Հանրապետութեան պետական շահը սպասարկելու վրայ, որովհետեւ ՀՀ պետական շահը ինքնիշխանի, այսինքն՝ Հայաստանի Հանրապետութեան ժողովրդի շահն է, Իրական Հայաստանում ապրող իրական մարդկանց շահը, որոնք Հայաստանի Հանրապետութիւնը ստեղծել են որպէս գործիք իր միջազգայնօրէն ճանաչուած տարածքում իրենց ազատութիւնը, բարեկեցութիւնը, երջանկութիւնը, անվտանգութիւնն ապահովելու համար, արդար միջավայր ձեւաւորելու համար եւ մենք պէտք չէ շեղուենք այս նպատակից”,– իր ուղերձին մէջ յատկապէս նշած է վարչապետը:
© 2023 Բոլոր իրաւունքները վերապահուած են։
