Ազերպայճանի Միլլի մեճլիսը (խորհրդարան) անմիջապէս հակազդելով Եւրոպական խորհրդարանի որդեգրած բանաձեւին՝ յայտարարած է, թէ ան (Եւրոպական խորհրդարանը), «մէկ կողմ ձգելով բոլոր խնդիրները, կրկին յարձակած է Ազերպայճանի վրայ»։

«Պաքու ընտելացած է ազերի ժողովուրդի օրինական ակնկալիքներու նկատմամբ Եւրոպական խորհրդարանի արհամարհական վերաբերումին։ Կարելի չեղաւ հաշտուիլ այն մտքին հետ, որ Ազերպայճան 44-օրեայ պատերազմով եւ հակաահաբեկչական գործողութիւններով ապահովեց իր տարածքային ամբողջականութիւնն ու ինքնիշխանութիւնը»,– նշուած է այդ երկրի խորհրդարանի հրապարակած հաղորդագրութեան մէջ։

Ընդգծելով, որ բանաձեւը «կը պարունակէ փաստեր, անհեթեթ յայտարարութիւններ, մեղադրանքներ, սպառնալիքներ ու կեղծ տեղեկութիւններու վրայ հիմնուած պահանջներ»՝ Պաքու զայն համարած է փաստաթուղթ մը, ուր մէկտեղուած են «Ազերպայճանի դէմ գործող տարբեր շահագրգիռ խումբերու կողմէ կիրարկուող նիւթեր ու ճնշումի գործիքներ»։

Բանաձեւը՝ ըստ Պաքուի, իր ներքին գործերուն միջամտելու փորձ մըն է։