Մայր Աթոռի կոչը՝ Մինսքի խումբի համանախագահող պետութիւններուն և միջազգային կազմակերպութիւններուն
«Օրերս Ադրբեջանի իշխանութիւնները յանձին՝ Մշակոյթի նախարարի, հանդէս են եկել հերթական հակահայկական նախաձեռնութեամբ:
Համաձայն վերջինիս յայտարարութեան՝ Ադրբեջանում ձեւաւորուել է տեղի եւ արտերկրեայ մասնագէտներից կազմուած “Աղուանական պատմութեան եւ ճարտարապետութեան մասնագէտների աշխատանքային խումբ”, որի նպատակն է, այսպէս կոչուած, աղուանական կրօնական տաճարներից հեռացնել “հայերի թողած կեղծ հետքերը”:
Մայր Աթոռ Սուրբ Էջմիածինը խստօրէն դատապարտում է ադրբեջանական իշխանութիւնների սոյն նախաձեռնութիւնը եւ այն որակում է որպէս հակամարդկային ու հակաքաղաքակրթական գործողութիւն` Հայաստանի, Արցախի եւ հայ ժողովրդի նկատմամբ շարունակական թշնամանքի ու ատելութեան ընդգծուած դրսեւորումներով:
Ադրբեջանի վերահսկողութեան տակ անցած Արցախի քրիստոնէական սրբավայրերի հայկական ինքնութիւնը գիտականօրէն հաստատուած իրողութիւն է եւ չի կարող վիճարկման առարկայ դառնալ խելամիտ ու առարկայական մտածողութեան շրջանակներում:
Մայր Աթոռ Սուրբ Էջմիածինը դիմում է Արցախեան հակամարտութեան կարգաւորման մէջ ներգրաւուած բոլոր երկրներին, առաջին հերթին ԵԱՀԿ Մինսկի խմբի համանախագահող պետութիւններին, քոյր եկեղեցիներին ու կրօնական կառոյցներին, միջազգային մասնագիտացուած կազմակերպութիւններին` խստագոյնս արձագանգելու Ադրբեջանի կողմից իրականացուող մշակութային եղեռնագործութեան անթաքոյց այս փաստին` կասեցնելու եւ կանխելու համար վանդալիզմի այս ու նմանօրինակ դրսեւորումները»:
