Սան Ֆեր­նանտօ Վա­լեյի (Լոս Ան­ճը­լըս) Վան Նայս թա­ղին մէջ գտնուող Սուրբ Պետ­րոս հայ­կա­կան եկե­ղեցին Հինգշաբ­թի, Սեպ­տեմբեր 23-ին թի­րախ դար­ձած է վան­դա­լական արար­քի։ Ան­ծա­­նօթ մը ջար­դու­փշուր ըրած է եկե­ղեց­­ւոյ շատ հա­զուա­գիւտ ութ երփ­նա­պա­կի­ները:

Ըստ Սուրբ Պետ­րոս եկե­ղեց­ւոյ հո­գեւոր հո­վիւ Շնորհք աւ. քհնյ Տե­միր­ճեանի՝ ապա­հովու­թեան տե­սախ­ցիկնե­րու ար­ձա­նագ­րութիւննե­րէն պար­զուած է, որ Չո­րեք­շաբթիէն Հինգշաբ­թի գի­շեր, ժա­մը 1.30-ի շուրջ, սեւազ­գեստ ան­ծա­նօթ մը, գդա­կը գլխուն ան­ցը­նելէ ետք սկսած է պէյզպո­լի մա­հակով մէկ առ մէկ կոտ­րել երփնա­պակի­ները:

Քա­հանան եւ եկե­ղեց­ւոյ վար­չութիւ­նը դէպ­քին մա­սին վե­րահա­սու դար­ձած են Հինգշաբ­թի առա­ւօտեան եւ ան­մի­ջապէս դի­մած են Լոս Ան­ճը­լըսի ոս­տի­կանու­թեան վար­չութեան, որ հա­ւաս­տած է, թէ աշ­խուժօ­րէն կը հե­տաքննէ մի­ջադէ­պը: Ըստ Տէր հօր՝ ոս­տի­կանու­թիւնը արար­քը որակած է «վան­դա­լու­թիւն»:

Եկե­ղեցին Հինգշաբ­թի օր Դի­մագիր­քի իր էջին յայտնած է, թէ՝ «գոյ­քե­րուն վրայ զգա­լի քա­նակու­թեամբ ապա­կիի փշուրներ կան։ Վան­դա­լու­թիւն կա­տարուած է նաեւ մեր հո­ղին վրայ գտնուող դրա­ցի եկե­ղեց­ւոյ նշա­նին նկատ­մամբ։ Մարմնա­կան վնաս կրած չկայ»։

«Հո­գեւոր հո­վիւը եւ ծխա­կան խոր­հուրդը ան­յա­պաղ մի­ջոց­նե­րու կը ձեռ­նարկեն Սուրբ Պետ­րոս հայ­կա­կան եկե­ղեց­ւոյ ապա­հովու­թեան եւ պաշտպա­նու­թեան հա­մար»,- աւել­ցուցած է եկե­ղեցին: ■