«Ես համոզուած եմ, որ Ազերպայճանի՝ Ղարաբաղի շրջանին մէջ ապրող Հայերու կեանքը շատ աւելի լաւ պիտի ըլլայ, քան բռնագրաւման տարիներուն»,– Հայերուն բարեկեցութիւն խոստացող Իլհամ Ալիեւի ղեկավարած երկրի փոքրամասնութիւնները, մինչդեռ, բոլորովին այլ պայմաններու տակ կ՚ապրին։
Եւլախի քրտաբնակ թաղամասը Ազերպայճանի մէջ յամառօրէն կ՚անուանեն «Գնչուներու» թաղամաս, թէեւ բնակիչները իրենք զիրենք քիւրտ կը համարեն։
Քարիւղով ու կազով հարուստ Ազերպայճանի այս շրջանը ապրողները զրկուած են կեանքի տարրական պայմաններէն՝ չունին ելեկտրականութիւն, կազ, կոյուղի, կպրապատ փողոցներ։ Աղքատութեան պատճառով բազմազաւակ տասնեակներով ընտանիքներ ի վիճակի չեն իրենց երախաները դպրոց ուղարկելու, անչափահասները կրթութիւն ստանալու փոխարէն իրենց ծնողներուն հետ օրուան հացի դրամ կը վաստկին՝ մուրացկանութիւն ընելով կամ լաւագոյն պարագային մետաղ կը հաւաքեն՝ վաճառելու յոյսով:
“Եթէ կառավարութիւնը իմ երախաներուն կօշիկ, սնունդ, հագուստ տայ, կամ եթէ ես նպաստ ստանամ, չեմ ստիպուիր մուրացկանութիւն ընելու”,– ըսած է շրջանի բնակիչներէն Կուլպարի Մամետովա, որ դժուարութեամբ համաձայնած է խօսիլ «Ազատութիւն» լրասփիւռի ազերպայճանական ծառայութեան հետ։ Ան ըսած է, որ ամէն անգամ, երբ իր խնդիրներու մասին արտայայտուած է, կա՛մ հայրենակիցները զինք ծաղրուծանակի ենթարկած են, կա՛մ ոստիկանութիւննը ճնշումներ բանեցուցած է՝ Ալիեւները քննադատելուն համար։
Որեւէ հեղինակաւոր կառոյց Ալիեւի խօսքերը չի հաստատեր
Մինչ Ազերպայճանի առաջնորդը միջազգային բեմերէն իրաւունքներ եւ բարեկեցութիւն կը խոստանայ Հայերուն, հպարտանալով «բազմազգ Ազերպայճանի մէջ տիրող բարձր մակարդակի հանդուրժողականութիւնով», որեւէ հեղինակաւոր կառոյց չի հաստատեր այդ խօսքերը։
Եւրոպական խորհրդարանը կը պնդէ, որ Ալիեւի վարչակազմը չի կատարեր ցեղային փոքրամասնութիւններու՝ Լեզգիներու, Թալիշներու, Հայերու եւ Քիւրտերու իրաւունքներու պաշտպանութեան հարցով ստանձնած իր պարտաւորութիւնները։
