Պաքուի մէջ ընթացող «դատավարութեան» ընթացքին, Արցախի նախկին նախագահ Արկադի Ղուկասեան անդրադառնալով 44-օրեայ պատերազմին Հայաստանի ներգրաւման, իբրեւ հիմք նշած է Հայաստանի` Արցախի անվտանգութեան երաշխաւոր ըլլալու հանգամանքը, որ,ըստ էութեան, կը համարուի օրինական։ Միաժամանակ ան հերքած է Պաքուի ամբաստանութիւնը՝ թէ Արցախի մէջ դուրսէն բերուած վարձկաններ եղած են։

Արկադի Ղուկասեան նաեւ անդրադարձած է երկար ժամանակ քաղաքական-տեղեկատուական հարթակներու վրայ շրջած՝ պատերազմը շատ աւելի առաջ դադրեցնելու կարելիութեան մասին քննարկումներուն, նշելով թէ ինք եւ Բակօ Սահակեան, պատերազմի օրերուն պաշտօնավարող նախագահ Արայիկ Յարութիւնեանի հետ հանդիպում ունեցած են, որուն նպատակը, ըստ էութեան, Հայաստանի ղեկավարութիւնը համոզելն էր, որ պէտք է ամէն ինչ ընել պատերազմը դադրեցնելու համար։