Հայոց լեզուն նոր արհեստագիտութիւններու հարթակներուն վրայ
ԹՈՒՄՕ-Ն եւ Գալուստ Կիւլպէնկեան հիմնարկութիւնը միասնաբար կը փորձեն լուծել նորագոյն արհեստագիտութիւններու մէջ Հայոց լեզուի կիրարկման հետ կապուած խնդիրները:
Վերջերս աշխարհի տարբեր ծայրերէն նշեալ բնագաւառի փորձագէտներ հաւաքուած են Երեւանի ԹՈՒՄՕ կեդրոնը՝ ուսումնասիրելու ամէնէն հեռանկարային գաղափարներն ու նախաձեռնութիւնները եւ քննարկելու օրուան առանցքային հարցերը, ինչպէս օրինակ՝ որո՞նք են այն հիմնական գործիքները, որ անհրաժեշտ են հայերէնը արհեստագիտական առաջատար դիրքերու հասցնելու համար. ի՞նչ կարելիութիւններ եւ վտանգներ կրնան բերել արուեստական բանականութեան վերջին զարգացումները եւ այլն։
Այս նախաձեռնութիւնը՝ եօթը տարի առաջ Կիւլպէնկեան հիմնարկութեան նախաձեռնութեամբ ԹՈՒՄՕ-ի մէջ կազմակերպուած «Հայոց լեզուի յառաջխաղացքը տեղեկատուական արհեստագիտութեան եւ հաղորդակցութեան նոր ձեւերու միջոցով» խորագրով դասընթացքին արգասիքն է:
Սոյն աշխատանքային հանդիպման ծրագիրը հետեւեալն է. հայերէն թուային տուեալներու աճող շտեմարանի ստեղծում, այդ տուեալներու հաւաքագրում` զանոնք դարձնելով բաց եւ հասանելի բոլորին, եւ աշխատանքային խումբի ձեւաւորում՝ վերահսկելու եւ կատարելու գործողութիւններ նշուած երկու նպատակներուն հասնելու համար։
Համոզում յայտնուած է, թէ մօտ ապագային կարելի է ակնկալել զգալի յառաջխաղացք:
