Մարտ 10-ին, Երեւանի մէջ սկսած է «Ապագայ Հայկականը» նախաձեռնութեան առաջին համաժողովը, որ միջազգայնօրէն յայտնի մասնակցային ժողովրդավարութեան ձեւաչափով առաջինն է հայկական իրականութեան մէջ։ Անոր կը մասնակցի շուրջ 200 հոգի՝ Հայաստանէն, Արցախէն եւ Սփիւռքէն։
«Ապագայ հայկականը» հիմնադրուած է Նուպար Աֆէեանի, Ռուբէն Վարդանեանի, Ռիչարտ Ազարնիայի, Արթուր Ալավերդեանի եւ այլոց կողմէ՝ համախմբելու աշխարհասփիւռ հայութեան եւ Հայաստանի բարեկամներու ջանքերը, փորձառութիւնն ու գիտելիքները՝ յանուն Հայրենիքի ու Սփիւռքի ապագայի կերտման:
Նախաձեռնութիւնը արդէն իսկ համախմբած է 110 հազարէ աւելի համակիրներ՝ աշխարհի 108 երկիրներէն:
Համաժողովը կը քննարկէ «Ապագայ հայկականը» նախաձեռնութեան կողմէ սահմանուած 15 նպատակներէն երեքը՝ «Հայաստան-Սփիւռք միասնականութիւն», «Պատմական պատասխանատւութիւն» եւ «Բնակչութեան աճ»:
Նոյն օրը, Արցախէն տեսակապով համաժողովին միացած է նախաձեռնութեան համահիմնադիր Ռուբէն Վարդանեան։ Ան իր ելոյթին յատկապէս ընդգծած է.
“Արցախի շրջափակումը ցոյց տուեց, որ հայ մարդը գաղափարների շուրջ քննարկումներ ունենալու մեծ պահանջ ունի: Արցախի շրջափակումը ցոյց տուեց, որ սուտ է, թէ Հայը մտածում է միայն ուտելու մասին, Հայն ունի մեծ պահանջ գաղափարների շուրջ քննարկումներ ունենալու: Նա պէտք է հաւատայ եւ դրա համար պիտի իմանայ, որ ինքը կարեւոր է՝ որպէս անձ: Դա չես կարող անել խանութները սնունդ լցնելով, կարեւոր է գաղափարը, առանց դրա մեզ մօտ ոչինչ չի իրականանալու”:
Վարդանեան նշած է որ, պատասխանատւութիւն ունինք թէ՛ զոհուած զինուորներու եւ թէ՛ մեր սերունդի նկատմամբ. “Մենք նրանց պէտք է փոխանցենք ոչ թէ կառքեր ու բնակարաններ, այլ արժանապատիւ հայկական ազգային արժէքներով կեանք”:
“Ես վստահ եմ, որ մեր այսօրուայ միջոցառումը, որին ցաւօք ես չեմ կարող ներկայ գտնուել, շատ կարեւոր դեր է խաղալու ապագայի համար եւ տալու է շատ կարեւոր հարցերի պատասխաններ: Շատ կարեւոր է յարգանքը դէպի գիտելիքը, դէպի աշխատանքը, դէպի ազգային աւանդութիւններն ու արժէքները, ես վստահ եմ՝ առանց դրանց ո՛չ մի բան չի իրականացուի”,– ըսած է ան:
Աւելցնենք, թէ համահայկական քաղաքացիական առաջին Համաժողովի մասնակիցներու ճնշող մեծամասնութիւնը՝ 93,7%-ը, քուէարկած է ի նպաստ այն տեսակէտին, ըստ որուն՝ «Արցախի հիմնախնդիրը 10 միլիոն հայութեան խնդիրն է»։
