Հայ համայնքի բողոքի ցոյցը՝ ընդդէմ Ազերպայճանի

Սեպտեմբեր 25-ին, Արժանթինի հայ համայնքի երիտասարդական կազմակերպութիւնները՝ Հանրապետութեան հայկական հաստատութիւններու (IARA) աջակցութեամբ երթ կազմակերպած են դէպի Ազերպայճանի դեսպանատուն՝ իրենց բողոքը արտայայտելով Սեպտեմբեր 13-ին Ազերպայճանի կողմէ Հայաստանի վրայ յարձակման կապակցութեամբ։ Լուրը հաղորդած է Diaro Armenia-ն։

Յիշեցնելով, որ Սեպտեմբեր 27-ին կը լրանայ Արցախի դէմ Թուրքիոյ աջակցութեամբ Ազերպայճանի սանձազերծած պատերազմի երկու տարին՝ երիտասարդները ընդգծած են. «13 օր առաջ Ազերպայճան սկսաւ նոր յարձակում, այս անգամ՝ Հայաստանի Հանրապետութեան ու ժողովուրդին դէմ»:

Երիտասարդները շեշտած են, որ ազերպայճանական բանակը կազմակերպուած յարձակումներ գործած է Հայաստանի տարբեր բնակավայրերու, սահմանամերձ շրջաններու վրայ։ Այդ յարձակումը ուղղուած էր Հայաստանի ինքնիշխան տարածքին դէմ, որու հետեւանքով կան զոհեր: Հակառակորդը թիրախաւորած է նաեւ քաղաքացիական ենթակառոյցներ:

Ցուցարարները ընդգծած են, որ յարձակման պատճառները նոյնն են, ինչ որ էի՛ն 1915-ին, երբ սկսաւ գործադրուիլ փանթուրքական ծրագիրը՝ Հայոց ցեղասպանութիւնը։

«Սա նոր ցեղասպանական փորձ է եւ ապացոյցները յստակ են: Մենք պէտք է խստօրէն դատապարտենք ազերպայճանական եւ թրքական ռազմական գործողութիւնները, որոնք կը սպառնան տարածաշրջանի խաղաղութեան եւ անվտանգութեան: Թող ամբողջ Արժանթին իմանայ, որ Ազերպայճանն ու Թուրքիան երկու ցեղասպան պետութիւններ են»,– նշուած է տեղւոյն իշխանութիւններուն ուղղուած դիմումին մէջ:

Երիտասարդները նաեւ ուղերձ յղած են Արժանթինի մէջ Ազերպայճանի նորանշանակ դեսպանին, շեշտելով որ՝ հոն կարելի չէ պարտադրել ժխտողականութեան քաղաքականութիւն, եւ թէ իրենք պիտի չլռեն։