Ապրիլ 19-ին, Արցախի Հանրապետութեան Ազգային ժողովի 5 խմբակցութիւնները հրապարակած են ստորեւ տրուած հաղորդագրութիւնը՝ անթոյլատրելի համարելով Արցախի փաստացի կարգավիճակը կասկածի տակ առնող յայտարարութիւնները.
«Արցախի Հանրապետութեան Ազգային ժողովի (ԱԺ) բոլոր խմբակցութիւնները վերահաստատում են ԱԺ-ի 2022 Ապրիլի 14-ի որոշման այն շեշտադրումը, որ “ո՛չ մի իշխանութիւն իրաւունք չունի «խաղաղութեան» պատրուակով Արցախի համար անընդունելի կարգավիճակի, ինչպէս նաեւ՝ միջազգայնօրէն ճանաչուած ինքնորոշման իրաւունքի բանակցային նշաձողը իջեցնելու”:
Արցախի ժողովուրդը ինքնորոշուելու իր որոշումն ընդունել եւ պատմական բնօրրանում աւելի քան երեք տասնամեակ դէ-ֆակտօ իրացրել է միանշանակ եւ ԽՍՀՄ օրէնսդրութեան դրոյթներին, ինչպէս նաև միջազգային իրաւունքի համընդհանուր չափանիշերի պահանջներին համապատասխան՝ առաջնորդուելով բացառապէս ժողովրդավարութեան սկզբունքներով։ Արցախի ինքնորոշման իրաւունքը սակարկման ենթակայ չէ:
Չնայած միջազգային հանրութեան գործադրած ջանքերին՝ ուղղուած տարածաշրջանում կայուն խաղաղութեան հաստատման, Ստեփանակերտ-Բաքու բանակցութիւնների միջոցով Արցախեան հիմնահարցի կարգաւորման, այնուամենայնիւ, Ադրբեջանի ղեկավարի՝ սպառնալիքներ պարունակող վերջին յայտարարութիւնները վկայում են, որ այդ երկրի ռազմաքաղաքական ղեկավարութիւնը, քամահրելով միջազգային հեղինակաւոր կառոյցների կոչերն ու որոշումները, ցեղասպանական գործողութիւններով ձգտում է հասնել իր հիմնական նպատակին՝ վերջնականապէս հայաթափել Արցախը:
Անընդունելի ենք համարում Հայաստանի վարչապետի այն տեսակէտը, որ նա հնչեցրել է Ազգային ժողովի Ապրիլ 18-ի նիստում, համաձայն որի Հայաստանը լիարժէք ճանաչում է Ադրբեջանի տարածքային ամբողջականութիւնը, փորձելով այդ ամէնը հիմնաւորել Մադրիդեան աշխատանքային փաստաթղթի մէկ կէտով, 2022 թ. Հոկտեմբերին Պրահայում եւ Սոչիում կայացած յայտնի հանդիպումների ժամանակ ձեռք բերուած համաձայնութիւններով, ինչպէս նաեւ հիմք ընդունելով Ալմա-աթայի 1991 թ. Դեկտեմբեր 21-ի հռչակագիրը, անտեսելով հանդերձ, որ Հայաստանի Հանրապետութիւնը այդ փաստաթուղթը ընդունել է Լեռնային Ղարաբաղի կարգավիճակին առնչուող սկզբունքային վերապահումներով։
Փաստօրէն Հայաստանի պաշտօնական շրջանակները Արցախի ժողովրդի անվտանգութեան ապահովման խնդիրը տարանջատում են նրա ինքնորոշման իրաւունքից՝ անտեսելով վերջինիս վճռորոշ պարագան, ինչն իրականում համահունչ է պաշտօնական Բաքուի դիրքորոշմանը, ըստ այդմ նպաստելով Արցախի ու Հայաստանի տարածքների նկատմամբ Ադրբեջանի բացայայտ ու յարաճող նկրտումների սաստկացմանը:
Արցախի Հանրապետութեան ժողովրդի անունից դիմում ենք.
• Հայաստանի Հանրապետութեան իշխանութիւններին՝ վերստին յորդորում ենք՝ չշեղուել Գերագոյն խորհրդի 1992 Յուլիս 8-ի որոշման ուղեգծից, միեւնոյն ժամանակ ուշադրութիւն հրաւիրելով այն կանխատեսելի հեռանկարի վրայ, որ Արցախի պետականութեան գլխին կախուած վտանգը կործանարար սպառնալիք է նաեւ Հայաստանի պետականութեան համար։
• Աշխարհասփիւռ հայութեանը` հաշուի առնելով, որ Արցախի Հանրապետութիւնը շուրջ 130 օր գտնւում է շրջափակման մէջ, համախումբ եւ վճռական ջանքերով, ամէն գնով կեանքի կոչել մեր համազգային ներուժը՝ սատար կանգնելով մեր ժողովրդի աննահանջ պայքարին։
• Ռուսաստանի Դաշնութեանը` լրացուցիչ դիւանագիտական եւ ռազմաքաղաքական միջոցներ ձեռնարկել մեզ համար խիստ կարեւոր խաղաղապահ առաքելութեան ընթացքում, անկախ աշխարհաքաղաքական իրադրութեան արդի զարգացումներից, վճռականօրէն թոյլ չտալ, որ սպառնալի վտանգի տակ յայտնուի Արցախի ժողովրդի հետագայ անվտանգութիւնը:
• Միջազգային հանրութեանը՝ չսահմանափակուել դէ-ֆակտօ կայացած Արցախի Հանրապետութեան աւելի քան 120 հազար խաղաղ բնակչութեան նկատմամբ՝ Ադրբեջանի Հանրապետութեան կողմից շրջափակման կապակցութեամբ կարեկցանքի յայտարարութիւններով եւ դիմել միջազգային իրաւական չափանիշերով ամրագրուած գործնական միջոցների:
• ԵԱՀԿ Մինսկի խմբի համանախագահ երկրների ղեկավարներին` անկախ ձեր միջեւ հնարաւոր տարաձայնութիւններից՝ ջանքեր գործադրել վերսկսելու Լեռնային Ղարաբաղի հիմնախնդրի կարգաւորման միակ միջազգային լիազօրագիր ունեցող ձեւաչափով բանակցութիւնները»։
«Ազատ հայրենիք» խմբակցութիւն
«Միասնական հայրենիք» խմբակցութիւն
«Արդարութիւն» խմբակցութիւն
«ՀՅ Դաշնակցութիւն» խմբակցութիւն
«Արցախի ժողովրդավարական կուսակցութիւն» խմբակցութիւն»
Ստեփանակերտ
2023 Ապրիլ 19
