Այս օրերուն, երբ Ազէրպայճան բռնագրաւած է Արցախի բնակավայրն ու ռազմավարական նշանակութիւն ունեցող բարձունքը, Մեծն Բրիտանիոյ Պաշտպանութեան նախարարութեան բարձրաստիճան պաշտօնեայ մը կ՚այցելէ Պաքու, իսկ Լոնտոնի մէջ Ազէրպայճանի դեսպանին հետ կը քննարկուին Արցախեան հակամարտութեան առնչուող հարցեր:
Այս մասին թելեկրամեան իր ալիքով յայտնած է ԱՀ Պետական նախարար Արտակ Բեգլարեան, գրելով.-
«Բրիտանական բացայայտ աջակցութիւնը Ադրբեջանին տեսել ենք 2020-ին, ադրբեջանա-թուրքական յարձակման ժամանակ: Հիմա էլ, Փառուխի ու Քարագլխի բռնագրաւման պայմաններում, Մեծ Բրիտանիան չի էլ թաքցնում իր ռազմավարական աջակցութիւնը, իսկ թէ վարագոյրներից այն կողմ ինչ ծաւալի ու տեսակի իրական աջակցութիւն է տրւում, կարող ենք միայն գուշակել:
Դա կատարւում է թէ՛ ադրբեջանա-թուրքական երկեակի դիրքերը տարածաշրջանում ամրացնելու, թէ՛ յատկապէս հիմա Ռուսաստանի կենսական շահերին հարուածելու նպատակով, ինչի հետեւանքով ոտնատակ են արւում Արցախի բնիկ ժողովրդի կեանքն ու անվտանգութիւնը:
Իսկ Արեւմուտքի կողմից “գովերգուող” մարդու իրաւունքներն ու ժողովրդավարութիւնը ամենեւին կարևոր չեն աշխարհաքաղաքական այսպիսի կեղտոտ խաղերում»:
