Ան պատասխանած է ՀՀ վարչապետի պաշտօնին իր թեկնածութեան կարելիութեան մասին հարցումին
Սեպտեմբեր 2-ին, Ստեփանակերտի «Փարք» պանդոկի (Park Hotel) խորհրդակցութիւններու դահլիճին մէջ տեղի ունեցած է «Աւրորա» մարդասիրական նախաձեռնութեան համահիմնադիր, ծանօթ գործարար Ռուբէն Վարդանեանի մամլոյ ասուլիսը:
Լրասփիւռներու հետ հանդիպումին ան յայտնած է, որ Ռուսաստանի քաղաքացիութենէն մտադիր էր աւելի ուշ հրաժարիլ, բայց Բերձորի դէպքերէն յետոյ առաջնահերթութիւն համարած է փոխադրուիլ Արցախ եւ իր ներդրումը ունենալ ստեղծուած խնդիրներու լուծման գործին մէջ:
“Ես հրաժարուել եմ Ռուսաստանի քաղաքացիութիւնից այստեղ գալու եւ Արցախի անվտանգութեան եւ զարգացման ճակատ ստեղծելու համար: Ես ծնունդով Արցախից չեմ: Առաջին անգամ Արցախ եմ եկել 2002 թուականին, բայց սիրում եմ Արցախը եւ լաւ եմ գիտակցում, որ Արցախը մեր յենարանն է: Այստեղ ես զինուոր եմ եւ պատրաստ եմ իմ ունակութիւնները, գիտելիքները եւ հնարաւորութիւնները նուիրել Արցախին, նրա անկախութեան պահպանմանն ու զարգացմանը”,– նշած է Վարդանեան՝ ընդգծելով դժուարութիւններու յաղթահարման գործին մէջ ապագայի նկատմամբ հաւատքի կարեւորութիւնը, որ ըստ անոր՝ կ՚ամրապնդուի համապատասխան աշխատանքով:
Հայաստանի հանրապետութեան վարչապետի պաշտօնին իր թեկնածութեան կարելիութեան մասին լրագրողներու հարցումներուն պատասխանելով՝ Վարդանեան յայտնած է.-
“Մարդը, ով պատրաստ չէ անել այն ամէնը, ինչ խոստացել է իր երկրին, ստախօս է։ Մարդը, ով պատրաստ չէ լքել իր յարմարաւէտութեան գօտին եւ անել այն ամէնը, ինչ անհրաժեշտ է հայրենիքին եւ ժողովրդին, բայց անում է մի՛այն այն, ինչն իրեն է ձեռնտու, լիովին ազնիւ չէ։
Անհրաժեշտութեան դէպքում՝ այո՛, ամէն ինչի էլ կը գնամ”։
Ան նաեւ աւելցուցած է, որ ինք ծրագրեր մշակած է, ներդրումներ ըրած է, որպէսզի Հայաստանը ըլլայ հզօր, երջանիկ եւ անկախ երկիր։
