Ամերիկայի Հայ դատի յանձնախմբի Կլէնտէյլի մասնաճիւղը խստօրէն կը դատապարտէ քաղաքի պատերուն վրայ փակցուած հակահայկական պաստառները, որոնք կը քարոզեն Հայոց ցեղասպանութիւնը աւարտին հասցնելու սարսափելի գաղափարը: Այս դատապարտելի արարքը կը յաջորդէ քանի մը շաբաթ առաջ Պեվըրլի հիլզի մէջ տեղի ունեցած նմանատիպ միջադէպին, որոնք կ՚ապացուցեն մեր համայնքներէն ներս հակահայ տրամադրութիւններու եւ ատելութեան յանցագործութիւններու աճող վտանգը:

«Իբրեւ Ամերիկահայ համայնքի բարօրութեան եւ յառաջընթացին նուիրուած կազմակերպութիւն, մենք խորապէս մտահոգ ենք այս ատելութեան արարքներէն, եւ տեղական իշխանութիւններուն կոչ կ՚ընենք մանրակրկիտ հետաքննելու սոյն միջադէպերը եւ պատասխանատուութեան ենթարկելու մեղաւորները:

Հայոց ցեղասպանութիւնը` մարդկային պատմութեան մութ էջերէն է, որ պատճառ դարձաւ 1,5 միլիոն Հայերու նահատակութեան եւ տեղահանութեան: Նման վայրագութիւններու շարունակութեան նպաստելը ոչ միայն բարոյապէս զազրելի է, այլ նաեւ ուղղակի սպառնալիք է մեր համայնքի ապահովութեան եւ բարեկեցութեան համար:

Մենք կոչ կ՚ընենք մեր համաքաղաքացիներուն՝ համերաշխ ըլլալ ատելութեան, խտրականութեան եւ բռնութեան դէմ։ Մինչ մեր համայնքը կը պատրաստուի համախմբուելու՝ ոգեկոչելու համար Հայոց ցեղասպանութեան 108-րդ տարելիցը, այս միջադէպը կը յիշեցնէ մեզի, որ պէտք է զգօն ըլլանք ցեղասպանութեան ժխտումին եւ բոլոր ձեւերով ատելութեան հրահրումին»,– նշուած է Հայ դատի յանձնախումբին Մարտ 31-ին հրապարակած հաղորդագրութեան մէջ։