Իրանի Զանճան նահանգին մէջ տեղի ունեցած տնտեսական նիստին, Հայաստանի մէջ Իրանի նորանշանակ դեսպան Մեհտի Սոպհանի յայտարարած է, որ դրացի երկիրներու հետ յարաբերութիւններու ընդլայնումը Իրանի կառավարութեան արտաքին քաղաքականութեան կարեւոր ազդակներէն է։ Լուրը կը հաղորդէ IRNA լրատու գործակալութիւնը։
Դեսպանը նշած է, թէ Զանճան նահանգին հետ տնտեսական կարելիութիւնները կրնան ամրապնդել Հայաստանի հետ առեւտրական յարաբերութիւնները։ “Հայաստանի հետ Իրանի ապրանքի շրջանառութեան առեւտրային արժէքը հասած է աւելի քան 700 միլիոն տոլարի, սակայն մեր նպատակն է այդ ծաւալը հասցնել 3 միլիառի”,– ըսած է ան։
Սոպհանի նաեւ յայտարարած է, թէ Հայաստան՝ իբրեւ Եւրասիական տնտեսական միութեան անդամ, կը հանդիսանայ Իրանի դարպասը դէպի 200 միլիոննոց շուկայ, վստահեցնելով, որ Իրանցի արտադրողները ուժ եւ հնարաւորութիւն ունին իրենց ձայնը լսելի դարձնելու այդ շուկային մէջ:
