Արցախի Արտաքին գործոց նախարարութեան հաղորդագրութիւնը
Արցախի Հանրապետութեան Արտաքին գործոց նախարարութիւնը մեկնաբանելով Եւրոպական Միութեան (ԵՄ) յատուկ ներկայացուցիչ Թոյվօ Քլաարի վերջին յայտարարութիւնները, նշած է, թէ եւրոպացի դիւանագէտին արտայայտութիւնները լուրջ հարցեր կը ստեղծեն չէզոք միջնորդի կարգավիճակին համապատասխանելու առումով, որուն կը յաւակնի ԵՄ-ի ներկայացուցիչը։
«Խօսելով Բերձորի միջանցքի վերաբերեալ Ադրբեջանի մօտեցումների ենթադրեալ օրինականութեան մասին՝ ԵՄ յատուկ ներկայացուցիչը ակնյայտօրէն անտեսում է տեղի ունեցող իրադարձութիւնների ընդհանուր ենթահողը։ Իսկ ենթահողն այն է, որ Ադրբեջան արդէն գրեթե երեք ամիս ապօրինաբար փակել է միջանցքը՝ խախտելով ո՛չ միայն 2020 Նոյեմբեր 9-ի եռակողմ յայտարարութեամբ ստանձնած պարտաւորութիւնները, այլեւ կոպտօրէն ոտնահարելով Արցախի ժողովրդի հիմնարար իրաւունքները։ Բերձորի միջանցքի նկատմամբ վերահսկողութեան անհրաժեշտութեան պատրուակով՝ Մարտ 5-ին Ադրբեջանի զինուած ուժերը դիմել են ահաբեկչական գործողութեան՝ կեանքից զրկելով Արցախի Հանրապետութեան Ոստիկանութեան երեք սպայի եւ ծանր վիրաւորելով եւս մէկին։
Հարկ է ընդգծել, որ միջանցքի փակման վերաբերեալ Ադրբեջանի բոլոր փաստարկները, այդ թւում՝ իբրեւ թէ միջանցքը ռազմական նպատակներով օգտագործելու մասին թեզը, հանգամանալից ուսումնասիրութիւնից յետոյ մերժուել են ՄԱԿ-ի Արդարադատութեան միջազգային դատարանի կողմից, որը պարտաւորեցրել է Ադրբեջանին ապահովելու մարդկանց, երթեւեկութեան միջոցների եւ բեռների անարգել տեղաշարժը Բերձորի միջանցքով՝ երկու ուղղություններով։ Կրկին յիշեցնում ենք, որ միջազգային դատարանի որոշումները իրաւաբանօրէն պարտադիր ուժ ունեն, որի մասին յայտարարել են նաեւ ԵՄ բարձրաստիճան ներկայացուցիչները։
Ադրբեջանի անօրինական յաւակնութիւններին սատարող նման արտայայտութիւնները այդ երկրի կողմից ընկալւում են որպէս Արցախի ցեղային զտման յանցաւոր քաղաքականութեան թողտւութիւն, որի հիմքում ընկած է Արցախի ժողովրդի կեանքի, ինքնորոշման, ազատութեան եւ խաղաղ զարգացման անքակտելի իրաւունքների ժխտումը։ Ադրբեջանը ձգտում է ստեղծել այնպիսի պայմաններ, որոնց դէպքում ոչինչ չի խանգարի Բաքուին ուժի միջոցով վերահսկողութիւն սահմանել Արցախի ողջ տարածքի վրայ եւ աւարտին հասցնել Արցախը հայաթափելու իր յանցաւոր ծրագրերը։
Եթէ ԵՄ յատուկ ներկայացուցիչը իսկապէս մտահոգ է տարածաշրջանի լարումը սրող գործողութիւններով, ապա խորհուրդ ենք տալիս ուշադրութիւն դարձնել Ադրբեջանի ռազմական գրգռութիւններին, յարձակողական եւ ռազմատենչ յայտարարութիւններին, ինչպէս նաեւ Արցախի բռնագրաւուած տարածքներում նոր զօրամասերի եւ այլ ռազմական ենթակառոյցների տեղակայմանը»,– նշուած է Արցախի Արտաքին գործոց նախարարութեան հրապարակած հաղորդագրութեան մէջ։
