Մարտ 14-ին, Եւրոպական Միութիւնը (ԵՄ) ողջունած է Հայաստանի եւ Ազերպայճանի յայտարարութիւնները՝ խաղաղութեան եւ միջպետական յարաբերութիւններու հաստատման համաձայնագրի նախագիծին շուրջ բանակցութիւններու աւարտին կապակցութեամբ։
«Մենք կ’ողջունենք կողմերը վերջին քանի մը տարիներու ընթացքին այս ուղղութեամբ իրենց յամառ աշխատանքին համար, թէ՛ երկկողմանի ձեւաչափով, թէ՛ ալ միջազգային հանրութեան ներգրաւումով։ ԵՄ-ը կ՚ողջունէ Հայաստանը, որ ճամբայ կը հարթէ խաղաղութեան համաձայնագրի նախագծին վերջնականացման համար։ Յայտարարութիւնները վճռական քայլ են տարածաշրջանին մէջ կայուն խաղաղութեան եւ ապահովութեան ուղղութեամբ։ Կարեւոր է, որ երկու կողմերն ալ պահպանեն այս թափը եւ ապահովեն այս գործընթացի սահուն աւարտը նոյն հեռանկարային եւ փոխզիջումային մօտեցումներով:
ԵՄ-ը ամբողջապէս կ՚աջակցի Հայաստան-Ազերպայճան յարաբերութիւններու կարգաւորման հոլովոյթին եւ պատրաստ է տրամադրելու յաւելեալ աջակցութիւն եւ մասնագիտական օգնութիւն, եթէ կողմերը այդպիսի խնդրանք ներկայացնեն»,– նշուած է ԵՄ-ի հրապարակած հաղորդագրութեան մէջ:
© 2023 Բոլոր իրաւունքները վերապահուած են։
