Երեւանի մէջ Ապրիլ 15-23 տեղի ունեցող ծանրաբարձութեան Եւրոպայի ախոյեանութեան՝ Հայաստան Ապրիլ 22-ին խմբովին կը գրաւէր երկրորդ տեղը։
– 67 քկ. դասակարգի երկամարտին (պոկում եւ ուսամբարձ-նետում) 320 քկ. բարձրացնելով Գոռ Սահակեան դարձած է Եւրոպայի ախոյեան:
– 81 քկ. դասակարգին՝ Ռաֆիկ Յարութիւնեան նուաճած է պրոնզէ մետալ։
– 89 քկ. դասակարգին՝ Եւրոպայի փոխախոյեան դարձած է Անդրանիկ Կարապետեան:
– 96 քկ. դասակարգին՝ Դաւիթ Յովհաննիսեան նուաճած է ոսկէ մետալ՝ դառնալով Եւրոպայի ախոյեան, իսկ Արա Աղանեան շահած է արծաթէ մետալ, յաջորդելով հայրենակցին եւ դառնալով փոխախոյեան:
Իսկ Հայաստանի աղջկանց հաւաքականի անդամ՝ 55 քկ. դասակարգի մարզիկ Իզաբելլա Եայլեան դարձած Եւրոպայի ախոյեանութեան պրոնզէ մետալակիր, մինչ 76 քկ. դասակարգին մէջ Տաթեւ Յակոբեան նուաճած է արծաթէ մետալ:
Ապրիլ 22-ի մրցումներուն՝ Հայաստան ունէր դեռ 5 ներկայացուցիչ։
Թուրքիոյ Ծանրաբարձութեան դաշնակցութեան նախագահը երեւանեան ախոյեանութիւնը վերջին 10 տարուան լաւագոյնը կը համարէ
Երեւանի մէջ տեղի ունեցած ծանրաբարձութեան Եւրոպայի ախոյեանութեան առաջին օրերէն թուրք մարզիկները 6 ոսկէ մետալ նուաճած են։ Թուրքիոյ Ծանրաբարձութեան դաշնակցութեան նախագահ Թալաթ Իւնլիւ մեծ ուրախութեամբ նշելով այս փաստը, Հայաստանի մէջ կազմակերպուած այս ախոյեանութիւնը գնահատած է վերջին տասը տարուան լաւագոյնը։
“Շատ լուրջ եւ լաւ պատրաստութիւն տեսած են կազմակերպիչները, մեզ տխրեցնող միակ բանը բոլորիդ ծանօթ դրուագն է՝ ցուցարարի մը անյարգալից արարքով: Իսկապէս, շատ ջանք գործադրուած է. ես մեր երկրի հեռատեսիլին ալ ըսի նոյն բանը, որ սա վերջին տասը տարուան լաւագոյնս կազմակերպուած Եւրոպայի ախոյեանութիւնն է”:
