Յունահռոմէական ոճի ըմբշամարտի Հայաստանի հաւաքականի անդամ, Ողիմպիական խաղերու ախոյեան Արթուր Ալեքսանեան չորրորդ անգամ ըլլալով դարձած է աշխարհի ախոյեան:
Սերպիոյ մայրաքաղաք Պելկրատի մէջ ընթացող յունահռոմէական ոճի ըմբշամարտի աշխարհի ախոյեանութեան մրցաշարքին՝ 97 քկ. դասակարգի եզրափակիչ մարտին Ալեքսանեան մրցած է պուլկարացի Քիրիլ Միլենով Միլովի հետ: Հայ ըմբիշը յաղթանակ տարած է 5-1 արդիւնքով:
Նշենք, որ հայ ախոյեանը այս յաջողութեան հասած է իր ճամբուն վրայ՝ 1/8 եզրափակիչին պարտութեան մատնելէ ետք աշխարհի կրկնակի ախոյեան, թուրք Մեթեհան Պաշարը:
Արթուր Ալեքսանեան Լոնտոն-2012-ի ողիմպիականներուն պրոնզէ, Ռիօ-2016-ին՝ ոսկէ, Թոքիօ-2020-ին՝ արծաթէ մետալներ նուաճած է: Ան աշխարհի ախոյեան դարձած է 2014, 2015, 2017 թուականներուն: Ալեքսանեան նաեւ երկու անգամ՝ 2013-ին եւ 2019-ին դարձած է աշխարհի ախոյեանութեան արծաթէ մետալակիր: Հայ ըմբիշը հինգ անգամ ալ Եւրոպայի ախոյեան դարձած է (2012, 2013, 2014, 2018, 2020 թուականներ), ինչպէս նաեւ Եւրոպական խաղերու ախոյեան:
