Ֆրանսայի Եւրոպական հարցերու եւ Արտաքին գործոց (ԱԳ) նախարար Ժան-Նոէլ Պառօ  Ազգային ժողովին մէջ տեղի ունեցած ունկնդրութիւններու ընթացքին, Ազերպայճանի՝ Հայաստանի նկատմամբ նոր պահանջները անընդունելի համարած է։

“Ազերպայճան հիմա ալ կը պահանջէ Հայաստանի Սահմանադրութեան վերանայում: Այս նոր նախապայմանը ընդունելի չէ եւ կը յետաձգէ խաղաղութեան համաձայնագրին կնքումը”,– յայտնած է նախարարը, աւելցնելով թէ Ֆրանսա մօտէն կը հետեւի Պաքուի մէջ բանտարկուած Արցախի հայերու դատավարութիւններուն:

“Ֆրանսա, ինչպէս նաեւ Եւրոպական Միութիւնը (ԵՄ), ուշադրութեամբ կը հետեւին կամայականօրէն կալանաւորուած բոլոր անձերու վիճակին եւ զանոնք ազատ արձակելու կոչ կ՚ընեն՝ Երեւանի եւ Պաքուի միջեւ ընթացող բանակցութիւններու հոլովոյթի շրջանակին մէջ”,– ըսած է ան:

“Հարաւային Կովկասը պէտք է դառնայ խաղաղութեան եւ բարգաւաճման տարածք”,– աւելցուցած է Պառօ՝ ընդգծելով, թէ ԵՄ-ը կրնայ դեր խաղալ «սահմանները բանալու, այդ տարածաշրջանը մեկուսացումէն դուրս բերելու համար՝ ի նպաստ տարածաշրջանի բնակչութեան»:

Պաքու կը հակազդէ

Պաքու անմիջապէս հակազդելով Ֆրանսայի ԱԳ նախարարին՝ յայտարարած է. «Ֆրանսայէն կը պահանջենք դադրեցնել խաղաղութեան չնպաստող քայլերը եւ խուսափիլ իրավիճակը ապակայունացնող գործողութիւններէ»։

“Անընդունելի է կասկածի տակ դնել Ազերպայճանի նկատմամբ տարածքային յաւակնութիւններ պարունակող Հայաստանի Սահմանադրութիւնը փոփոխելու օրինական պահանջը,– որ կը քննարկուի աւելի քան երկու տարիէ ի վեր,– եւ զայն որպէս նոր պայման ներկայացնելը։ Եթէ Ֆրանսա իրապէս կ՚աջակցի խաղաղութեան համաձայնագրի շուտափոյթ կնքման, ինչպէս որ կը յայտարարէ, ապա պէտք է կոչ ընէ Հայաստանին համապատասխան քայլերու ձեռնարկելու այդ ուղղութեամբ: Կը պահանջենք դադրեցնել խաղաղութեան չնպաստող քայլերը եւ խուսափիլ գործողութիւններէ, որոնք կ՚ապակայունացնեն կացութիւնը տարածաշրջանին մէջ”,– ըսած է Ազերպայճանի ԱԳ նախարարութեան բանբեր Այխան Հաճիզատէ։