Յուլիս 24-ին, Թեհրանի մէջ Իրանի նախագահ Իպրահիմ Ռայիսի ընդունած է Հայաստանի Արտաքին գործոց նախարար Արարատ Միրզոյեանը:
Գոհունակութեամբ արձանագրուած է, որ բարեկամ եւ դրացի երկու երկիրներու միջեւ հաստատուած բարձր մակարդակի քաղաքական երկխօսութիւնը՝ հիմնուած է փոխադարձ յարգանքի եւ երկու ժողովուրդներու հազարամեայ եղբայրութեան վրայ:
Հանդիպումին քննարկուած են հայ-իրանական տարբեր բնագաւառներու մէջ համագործակցութեան առնչուող հարցեր: Այս համածիրին մէջ յատկապէս ընդգծուած է երկու երկիրներու միջեւ առեւտրատնտեսական, ուժանիւթի եւ երթեւեկութեան մարզերու ընթացիկ ու նախանշուած միատեղ ծրագրերու իրագործման կարեւորութիւնը:
Ի շարունակութիւն Իրանի եւ Հայաստանի Արտաքին գործոց նախարարներու մակարդակով նոյն օրը կայացած քննարկման, Արարատ Միրզոյեանի եւ Իպրահիմ Ռայիսիի ուշադրութեան կեդրոնը եղած են տարածաշրջանային անվտանգութեան վերաբերող խնդիրները:
Միրզոյեան Իրանի նախագահին ներկայացուցած է Հայաստան-Ազերպայճան յարաբերութիւններու կարգաւորման հոլովոյթի վերջին զարգացումները, ինչպէս նաեւ վերահաստատած Հարաւային Կովկասի մէջ մնայուն խաղաղութեան վերաբերեալ հայկական կողմի տեսլականը: Ընդգծուած է ուժի կամ ուժի սպառնալիքի կիրարկման միջոցով հարցերու լուծման, առաւելապաշտական եւ թշնամական հռետորաբանութեան բացառման անհրաժեշտութիւնը:
Անդրադառնալով Բերձորի միջանցքի ապօրինի փակման հետեւանքով Արցախի մէջ սրուող մարդասիրական ճգնաժամին՝ Միրզոյեան շեշտած է միջանցքի արգելքի անյապաղ վերացման եւ Ազերպայճանի միտած՝ Արցախի բնակչութեան ցեղային զտումը կանխելու հրամայականը
Իր կարգին, Ռայիսի յայտնած է, թէ կը յուսայ, որ Երեւանի եւ Պաքուի միջեւ բանակցութիւնները՝ տարածաշրջանի խաղաղութեան եւ ապահովութեան խթան կը հանդիսանան։ Ան նաեւ շեշտած է, որ Թեհրան կ՚աջակցի շրջանի բոլոր երկիրներու հողային ամբողջականութեան:
“Իրանի Իսլամական Հանրապետութիւնը աշխարհաքաղաքական որեւէ փոփոխութիւն, տարածաշրջանի երկիրներու սահմաններու փոփոխութիւն չ՚ընդունիր եւ կ՚աջակցի տարածաշրջանի բոլոր երկիրներու ինքնիշխանութեան եւ հողային ամբողջականութեան”,– ըստ Իրանի նախագահի մամլոյ ծառայութեան՝ յայտարարած է Ռայիսի:
