Փետրուար 26-ին, Թիֆլիսի Սուրբ Գէորգ առաջնորդանիստ եկեղեցւոյ մէջ, Վիրահայոց թեմի առաջնորդ Կիրակոս վրդ. Դաւթեանի հանդիսապետութեամբ, խորանի փակ վարագոյրի ետին մատուցուած է կիրակնօրեայ պատարագ: Վիրապ քհնյ Ղազարեան յաւուր պատշաճի քարոզ խօսած է Հայ Առաքելական եկեղեցւոյ օրացոյցով սկսած Մեծ պահքի երկրորդ Կիրակիի խորհուրդին մասին: Ան իր քարոզին մէջ անդրադարձած է 1988 Փետրուար 27–29-ի օրերուն խորհրդային Ազերպայճանի Սումկայիթ քաղաքին հայ ազգաբնակչութեան դէմ գործուած եղեռնին ու զանգուածային տեղահանութեան:
Հաւատացեալներով լեցուն եկեղեցւոյ մէջ Առաջնորդ հօր նախագահութեամբ եւ հոգեւորականաց ու սարկաւագաց դասի մասնակցութեամբ, հոգեհանգստեան պաշտօն կատարուած է հայատեացութեան զոհ դարձած անմեղ մարդոց հոգիներու խաղաղութեան համար:
